Khua mua pơ ala mơnuih ƀon sang tơring čar Dak Lăk tal 11 phrâo lăi pơthâo Hră pơtrun djru pơhưč, pơtô pơjuăt, pơđĭ tui mơnuih mă bruă rơgơi rơwang thun 2026-2031. Rơnoh prăk djru lu biă ñu lĕ 2 klai prăk hăng nai tha prin arăng pia giáo sư hơmâo iâu pơmut ngă bruă ƀơi anai. Hơdră djru anai pơhưč mơnuih mă bruă rơgơi amăng 12 bruă mă akŏ phun, anun lĕ ngă hmua mă yua boh thâo phrâo, pơkra gơnam hăng măi mok, pơkra apui lơtrik hơdjă, logistics, čơkă tuai hyu ngui, pơtô pơjuăt, prăk kăk, boh thâo ia rơgơi, pơčeh phrâo, hăng ba yua boh thâo mrô.

Hăng mơnuih hơmâo ruah pơmut, ngă bruă kơnuk kơna laih anun ƀuăn ngă bruă aset biă ñu lĕ 7 thun, rơnoh prăk djru ha wơ̆t hnăng blung lĕ mơ̆ng 500 klăk prăk hăng mơnuih hơmâo ƀang gưl prong đại học, 700 klăk prăk hăng mơnuih hơmâo ƀang thạc sỹ, 1 klai hăng mơnuih hơmâo ƀang tiến sĩ (nai prin tha), 1,5 klai prăk hăng kơ-iăng nai tha prin (jing phó giáo sư), laih anun 2 klai prăk hăng nai tha prin (giáo sư). Ơi Trương Ngọc Tuấn, Khua gơnong bruă čar Dak Lăk brơi thâo, tơlơi djru anai čang rơmang pơđĭ tui tơlơi apăn bruă mơ̆ng mơnuih mă bruă, kiăo tui anŏ či kiăng đĭ kyar bơwih ƀong huă - mơnuih mơnam mơ̆ng tơring čar Dak Lăk amăng thun blan phrâo./.