VOV4.Jarai - Lơ 22/8, hrŏm hăng lu tơring čar amăng đơ đam dêh čar, ƀing čơđai hrăm anih 1 ƀơi tơring čar Gia Lai mut sang hră laih. Amăng 2 wŏt hrơi tơjuh mut sang hră hlâo kơ hrơi pơphun mut sang hră ngă kơ ƀing čơđai hrăm tui ƀơƀrư̆, ngă ƀing čơđai huăi sư̆ rơbư̆ hlâo kơ yak nao thun hrăm phrâo.  Thun hrăm 2022-2023, đơ đam tơring čar Gia lai hơmâo 209 boh sang hră gưl sa, hơmâo 1.200 anih 1, hăng giăm 35.000 čô čơđai.

Čơđai hrăm anih 1, sang hră gưl sa Nguyễn Trãi, să Ia Pếch, tơring glông Ia Grai amăng hrơi mut sang hră

Hlâo anun, gơnong bruă pơtô pơjuăt hơmâo hră pơ-ar rơkâo djop anom bruă pơtô hrăm git gai hơdôm gơnong bruă pơtô hrăm gưl sa tui tơlơi jao wai lăng prap lui klă hloh hlâo kơ hrơi čơkă ƀing čơđai anih 1 mut hrăm hră, tañ ƀiă 2 wŏt hrơi tơjuh hlâo kơ hrơi pơphun mut sang hră sit nik, ngă kơ ƀing čơđai juăt hăng anih hră gưl sa kah hăng bruă yua hră, gai čih.

Siu Đoan: Pơblang