VOV4.Jarai - Amăng rơwang hrơi tơjuh rơgao, ƀơi kual Dap Kơdư, mrô mơnuih ƀă klin Covid-19 jai hrơi lu tui. Hơdôm boh tơring čar hơdip hrŏm, ngă bruă hơdeč hmar amăng bruă pơjrao brơi mơnuih ruă hăng pơtô hrăm. Tơlơi anai ƀrô djru ƀing duam ruă djơhôl pran jua ƀiă, plai ƀiă mơn ngă kơhniă đơi anih đih amăng sang ia jrao, laih dong pơhlôm rơnuk rơnua bruă pơtô hăng hrăm. Pô hyu mă tơlơi pơhing phrâo mơng Gong phun jua pơhiăp Việt Nam ƀơi kual Dap Kơdư pôr pơthâo glăi tơlơi hơmâo sit Gia Lai hăng Dak Lăk.

Mơng bruă test hmar ƀơi sang ia jrao phường Yên Thế, amai Bùi Thị Như Hoa ƀơi sang mrô 79 jơlan Lê Văn Sỹ, plơi prong Pleiku, Gia Lai ƀuh ñu ƀă kman SARS-CoV-2. Amai Hoa hơmâo tlâ̆o 3 ară vaccine pơgang Covid-19 laih, aka ƀu mưn pơtuk, duam hơget ôh, anun jing brơi pơčlah hơjăn, pơjrao pơ sang. Rim hrơi, ñu wai lăng mă pô, pơkă ayuh pơ-iă drơi ñu, lăi pơthâo glăi kơ ƀing ơi ia jrao phường. Mơng telephôn iâu nao, amai Hoa brơi thâo, ñu pơjrao pơ sang tui anai jing mơ-ak, djơhôl pran biă:

“Rim hrơi kâo pơhiăp amăng zalo hăng ƀing ơi ia jrao. Kâo ƀu pơtuk, duam ôh, anun jing kâo gir ƀong huă jơman, ƀong gơnam ngă hiam kơ drơi jăn, mơñum lu ia kam, mơñum lu ia ƀlăng, ia kiăng hơmâo pran. Ta dưi pơjrao mă pô pơ sang, tơdah nao pơ sang ia jrao amuñ pơƀă nao rai tơdruă dong, ƀudah ruă kơtang tui. Anun jing kâo lăng bruă pơjrao pơ sang tui anai klă, djơ̆ yơh”.

F0 pơjrao pơ sang ƀơi să Diên Phú, Pleiku

Ơi ia jrao Lê Thiện Thanh - Kơ-iăng khua Sang ia jrao plơi prong Pleiku brơi thâo, mơng mơkrah blan 2 truh ră anai, plơi prong hơmâo rơbêh 600 čô F0 ruă rơnang pơjrao mă pơ sang. Ră anai, kơnong hơmâo 1/5 mrô mơnuih đôč amăng ha hrơi, lêng kơ ƀing tha, mơnuih hơmâo tơlơi ruă hơđăp kah mơng đih pơ sang ia jrao. Ơi Thanh brơi thâo, amăng hrơi mông kơƀah mơnuih ngă bruă, hơdôm boh sang ia jrao să, phường glăk pơkiăo nao mơnuih apăn bruă ngă hrŏm hăng hơdôm grup Covid-19 amăng plơi pla krăp lăng tơlơi suaih pral ƀing ruă, pơhlôm djru pơjrao brơi ječ, ba pô ruă nao pơ sang ia jrao tơdah ruă kơtang:

“Ƀing ơi ia jrao ƀơi phương 1 hơmâo 5, 6 čô đôč, ngă lu bruă biă, rim hrơi iâu telephôn pơhiăp tom mơnuih ƀă F0, lăng ba ƀing ƀă klin mơ̆ duam, pơtuk, ƀu anăm suă pran, yua hnun gơmơi ăt akŏ pơdong hơmâo 3 grup đuăi nao djru mơnuih ruă kơtang, kiăng anih ƀơi thơ kơhniă đơi lĕ gơmơi djru ba amăng hơdôm hrơi. Lơ̆m sang ia jrao să hơđong lĕ gơmơi đuăi nao pơ sang ia jrao pơkŏn dong”.

Ơi ia jrao phường Yên Thế mă čơđeh ia adung ƀing čơđai  pioh pơčrang kman.

Ƀơi plơi prong Buôn Ma Thuột, tơring čar Dak Lăk, ƀơi anăp bruă hơmâo mơnuih F0 amăng sang hră jai hrơi lu, lu sang hră hơdeč hmar pơgang glăi, pơplih mơng hrăm pơ sang hră jing hrăm mơng ataih dong. Hrŏm hăng ngă tui hơbô̆ bruă “2 amăng 1”, pơtô pơ sang hră rah, pơtô mơng ataih rah, jing tơlơi gir run ngă hơđong pran jua ƀing nai pơtô, čơđai sang hră ƀơi anăp bruă hơmâo lu đơi F0 amăng sang hră.

Phrâo nao hrăm glăi găp 1 wơ̆t hrơi tơjuh đôč, mrô mơnuih ƀă klin Covid-19 jai lu tui amăng sang hră, Jơnum min mơnuih ƀon sang plơi prong Buôn Ma Thuột hơmâo ngă git gai hơdôm boh sang hră muai mầm non, gưl sa hăng čơđai hrăm anih 6 hơdai hrăm mơng ataih online dong. Sang anŏ amai Trần Thị Đông, dŏ ƀơi phương Tân Thành, plơi prong Buôn Ma Thuột hơmâo 2 čô ană khŏm pot glăi hrăm mơng ataih dong. Amai Đông tŭ ư biă hăng jơlan ngă bruă pơplih hơdeč tui anai.

“Ră anai klin kheng tui anai kâo dong yua bruă hrăm online samơ̆ ăt čang rơmang pơ anăp anai klin dưi pơgang hĭ, ƀing čơđai dưi nao hrăm pơ sang hră, yua dah hrăm pơ sang hră čơđai ñu thâo hluh hloh mơn, amĭ ama ƀing čơđai hơđong pran jua hloh mơn”.

Ƀơi anăp bruă hơmâo mrô F0 lu amăng sang hră, kơnong amăng ha wơt hrơi tơjuh, plơi prong Buôn Ma Thuột čih pioh hơmâo rơbêh 40 čô mơnuih ƀă klin lĕ nai pơtô hăng rơbêh 430 čô čơđai sang hră. Anom bruă pơtô hăng pơjuăt plơi prong hơmâo lăi pơthâo rơkâo Jơnum min mơnuih ƀon sang plơi prong brơi pơdơi hrăm pơ sang hră hăng abih bang ƀing čơđai, rơngiao mă anih 9 hăng 12 đôč. Khă hnun hai, tui hăng tơlơi hmư̆ hing, ƀơi anih 9 hăng anih 12 mơng lu sang hră, kơƀang hrăm hră hui mơnuih laih yua dah ƀing čơđai rơkut jai hrơi lu. Ră anai anih 9 mơng sang hră gưl 2 Lạc Long Quân ăt dŏ hrăm pơ sang hră mơn, hăng 50% mrô čơđai sang hră, mrô čơđai dŏ glăi hrăm online. Sang hră hơmâo laih 38 čô mơnuih F0 lĕ nai pơtô hăng čơđai sang hră. Ơi Phan Thanh Thủy, Khua sang hră gưl 2 Lạc Long Quân, plơi prong Buôn Ma Thuột, Dak Lăk brơi thâo:

“Hơmâo lu F0 amăng sang hră lĕ yua hơmâo ƀơi hơdôm anom bruă brơi mơnuih ƀon sang dŏ jăng jai, gơmơi hơmâo pơhiăp tom laih hơdôm anih brơi mơnuih ƀon sang dŏ jăng jai hơmâo rông čơđai lơ̆m hơmâo F0 kiăng lăi pơthâo kơ hơdôm anom apăn bruă djru ba, kiăng ƀing čơđai hơđong pran nao hrăm hră”.

Anih hrăm 9A,  Sang hră Lạc Long Quân, plơi prong Buôn M a Thuột hrăm pơ sang hră rah, hrăm online rah.

Tui hăng yă Mai Thị Hồng Hà, Khua anom bruă pơtô hăng pơjuăt plơi prong Buôn Ma Thuột, Dak Lăk, klin Covid-19 ƀơi Dak Lăk ăt dŏ kơtang đôč hăng hơdôm rơbâo čô mơnuih ƀă klin rim hrơi. Ƀơi hơdôm boh sang hră, bruă hơmâo mơnuih ƀă klin hơmâo arăng prăp rơmet pơgang hlâo laih, samơ̆ mrô F0 đĭ kơtang đơi anun jing ngă nai pơtô, amĭ ama ƀing čơđai, čơđai sang hră hŭi mơn. Ƀrô pơgang klin covid-19 rah, pơtô hrăm klă hai, ƀrô ngă hơđong pran jua brơi čơđai sang hră, amĭ ama ƀing čơđai hăng nai pơtô rah jing bruă kiăng ngă hlâo mơng hơdôm boh sang hră ră anai.

“Mrô F0 ƀu kơnong hơmâo ƀơi čơđai sang hră đôč ôh hơmâo ƀơi ƀing nai pơtô hai anun jing bơbeč sat kơ bruă pơtô hăng hrăm, tui anun ƀing gơmơi pơtô ba ƀing anai hmư̆ hing mrô mơnuih ƀă klin, biă ñu amăng ƀing nai pơtô đah mơng djru ba tañ, anom bruă ăt kiăo tui pơtrun tơlơi git gai pơtô ba hơdôm boh sang hră ngă klă bruă pơtô hrăm, ngă giong bruă pơtô hrăm amăng thun 2021-2022”.

VOV Tây Nguyên: Čih - Siu H’Mai: Pơblang