Tui tơlơi lăi pơthâo amăng mông Jơnum Grŭp mă bruă Ping gah tơring čar Gia Lai, tal 12, (pok prong), rơnoh pơđĭ kyar bơwih ƀong mơng Gia Lai 6 blan rơgao hmâo 5,5% bơhmu hăng thun 2022. Hơdôm tơhnal pơkă kơ abih bang pơhrui ngăn drăp, bruă mă gah măi mok, amăng ƀrư̆ hmâo 48,7 hăng 44,6%; mrô anom bơwih ƀong ngă hră bơwih ƀong pơwot glăi hăng mrô rơwang bruă tuh pơplai đĭ; bruă tuai hyu čuă ngui pơplih klă na nao.

Khă hnun hai, lu anih anom amăng tơring čar Gia Lai ăt bưp tơnap mơn amăng pơhrui prăk mă yua lŏn ba truh kơƀah prăk mă yua hơdôm rơwang bruă tuh pơplai; tơnap pok pơhai pla kyâo yua kơ hơdră pơkă ră anai akă hmâo tơhnal pơsur, kaih mă yua kơčăo bruă mă yua lŏn; rơnoh pok pơhai hơdôm jơlan hơdră pơkă mơng lŏn ia kaih, hơđah biă ñu kah hăng Jơlan hơdră pơkă mơ̆ng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă hăng čư̆ siăng.

Kơnong bruă tuh pơplai bruă hrŏm, abih blan 6/2023, tơring čar pơsir hmâo giăm truh 600 klai prăk amăng abih bang ngăn drăp 4.178 klai prăk tuh pơplai amăng sa thun, hmâo 13,85%. Anai ăt lĕ bruă mơ̆ Jơnum min mơnuih ƀôn sang tơring čar Gia Lai hăng hơdôm gơnong bruă mơ̆ng tơring čar đing nao pơsir hlâo pơ̆ anăp anai. Jơnum min mơnuih ƀôn sang tơring čar Gia Lai ăt pơdong mơn 3 grŭp hyu mă bruă pioh đĭ tui bruă pel ĕp, pơtrut pơsur, pơsir hơdôm tơlơi phrâo phun hmâo. Ơi Đinh Hữu Hòa – Kơ-iăng Khua gơgrong gah Gơnong bruă wai lăng kơčăo bruă hăng tuh pơplai tơring čar Gia Lai brơi thâo:

 “Hơdôm gơnong bruă gum pơsit hrŏm, pơsĭt hră kač man pơdŏng, gir run ngă ƀiă hrơi pơsit pioh lăi pơthâo rơwang bruă, pơhlôm kơjăp. 5 lĕ Gơnong bruă kông ngăn glai klô, rơhuông adai lŏn mơnai ăt kiăng lăi pơthâo Jơnum min mơnuih ƀôn sang tơring čar pơtlaih lŏn pioh kơ rơwang bruă. Bơ̆ hăng hơdôm grŭp hyu mă bruă, ăt kiăng pơtrut tañ pel ĕp mơn, gum hrŏm hơdôm anih anom lăi pơthâo ƀirô hmâo tơlơi dưi pơsir kiăng ngă hiưm hơpă tañ rơnoh".

Ăt amăng rơwang hrơi tơjuh rơgao mơn, Khul khua pơ ala mơnuih ƀôn sang tơring čar Kon Tum pơphun Tal jơnum lok 5 kiăng bơkơtuai pơsit tơlơi bơwih ƀong – mơnuih mơnam 6 blan akô̆ thun, pơsit jơlan gah, bruă mă phun 6 blan rơnuč thun 2023 hăng pơsit hơdôm bôh yôm gah pô dưi. Kiăo tui anun, 6 blan akô̆ thun rơnoh đĭ kyar abih bang gơnam amăng tơring čar hmâo 6,8% bơhmu hăng thun hlâo, dŏng tal 22 amăng 63 bôh tơring čar, ƀôn prong đơ đam dêh čar hăng dlông hloh kual Dap Kơdư. Amăng anun kual sang măi hăng man pơdŏng đĭ 10,88%; bruă đang hmua, đang kyâo hăng akan hơdang đĭ 5,65%; bruă bơwih buang đĭ 5,31%.

Khă Kon Tum hmâo rơnoh đĭ kyar glông hloh kual Dap Kơdư, samơ̆ ăt ƀiă hloh mơn bơhmu hăng tơhnal pơkă đĭ 10% mơ̆ tơring čar ba tơbiă amăng thun anai. Hrŏm hăng anun 6 blan akô̆ thun pơhrui ngăn drăp yap him lăng ngă tui giăm truh 1.840 klai prăk kơnong kơ hmâo giăm truh 41% kơčăo bruă; bruă pơsir anih anom mă yua kơ rơwang bruă, ring bruă phun ăt bưp mơn tơlơi tơnap...

Pơhiăp amăng mông pok phun tal jơnum, ơi Dương Văn Trang, Ding kơna Ping gah dêh čar, Khua git gai Ping gah tơring čar, Khua Khul pơ ala mơnuih ƀôn sang tơring čar Kon Tum lăi lĕ, kiăng hmâo jơlan gah pơsir khut khăt hloh pơplih pơkra, hơkrŭ pơsir mơtăm hơdôm bruă akă ngă giong, akă dưi ngă, biă ñu tơlơi măi mok, hơdră pơkă akă tơpă; bĕ, pơtrut nao rai, huĭ gơgrong ba mơng sa dua čô mơnuih apăn brua, amăng ngă tui bruă hrŏm... kiăng djru ngă giong truh kih hơdôm tơhnal pơkă, tơhnal ba tơbiă bơwih ƀong – mơnuih mơnam thun 2023:

 “Ƀing khua pơ ala mơ̆ng Khul pơ ala mơnuih ƀôn sang tơring čar đing nao pơblang rơđah, pơsit tơpă, bôh tơhnal dưi ngă, hơdôm bruă akă ngă giong, tơlơi tơnap amăng ngă tui hơdôm tơhnal ba tơbiă bơwih ƀong – mơnuih mơnam hăng bruă ngă giong tơhnal pơkă pơđĭ kyar mơng sa thun 2023, biă ñu bruă ngă pơhưč tuh pơplai, pơsir prăk mă yua bruă hrŏm hăng pok pơhai hơdôm jơlan hơdră pơkă mơng lŏn ia. Ngă rơđah bôh than ba truh, mơ̆ng lu bơnah amăng bruă mă yua hră pơ-ar pơplih phrâo hơdôm hơdră pơtrun mơ̆ng Ping gah hăng bruă pok pơhai, pơphun ngă tui ƀơi hơdôm gưl, hơdôm gơnong bruă”.

Ăt amăng tal jơnum lok 5, Khul khua pơ ala mơnuih ƀôn sang tơring čar Kon Tum tal 12, rơwang bruă 2021-2026 hmâo pel ĕp, pơsit hăng 32 bôh yôm Jơnum min mơnuih ƀôn sang tơring čar lăi pơthâo amăng tal jơnum, amăng anun hmâo sa dua hơdră bruă yôm phăn, kah hăng: Rơnoh djru pioh ngă tui Jơlan hơdră pơpha anih mơnuih ƀôn sang dô̆ mơ̆ng kual juăt hmâo kơthel hơjan ia ling dăo ngă, kual tơnap tap, guai dêh čar, mơnuih đuăi hyu dô̆ hơdơ̆ či hor, kual glai mă yua lu mơta ƀơi tơring čar; pơpha ngăn rơnoh djru pơđĭ kyar anom mă bruă hrom; pơplih pơkra kơčăo bruă ngă tui hơdôm jơlan hơdră pơkă mơ̆ng lŏn ia thun 2022, 2023 hăng pơkă hlâo jơlan gah pơpha kơčăo bruă tuh pơ plai bruă hrŏm thun 2024./.