VOV4.Jarai - Thun hrăm phrâo 2022-2023, anom bruă pơtô hrăm tơring čar Gia Lai glăk kơƀah rơbêh 3700 čô nai pơtô. Ƀơi anăp tơlơi tơnap anai, lu hơdră pơsir ječ ameč hơmâo anom bruă pơtô hrăm mă yua đah mơng pơhlôm anŏ klă bruă pơtô hăng hrăm.

Amăng thun hrăm phrâo, Sang hră Muai Hoa Hồng, plơi prong Pleiku ruah 850 čô čơđai kơ 22 anih hrăm. Nai Trần Thị Thủy, Khua sang hră Muai Hoa Hồng brơi thâo, sang hră glăk kơƀah 15 čô nai pơtô sit nik kơ thun hrăm phrâo anun jing dŏ bơgơ̆t biă mă.

“Ră anai sang hră kơnong hơmâo djŏp 22 čô nai pơhlôm djŏp brơi 1 čô nai pơtô lơ̆m sa boh sang hră, bơ dŏ glăi lĕ djru brơi čơđai sang hră 5 thun, mrô dŏ glăi lĕ čơđai mơng 3 truh 4 thun glăk kơƀah nai pơtô. Gơmơi glăk rơkâo đĭ hăng anom bruă pơtô hrăm laih anun Jơnum min mơnuih ƀon sang plơi prong tơdơi kơ hrơi jơnum mut thun hrăm phrâo khŏm pơhlôm hơmâo djŏp nai pơtô đah mơng dưi čem rông, pơtô ba čơđai”.

Ơi Phạm Văn Đại - Khua anom bruă pơtô hăng pơjuăt tơring glông Ia Grai brơi thâo: tơring glông hơmâo 46 boh sang hră hăng rơbêh 1.200 čô khua, nai pơtô hăng mơnuih mă bruă. Mông anai, tơring glông Ia Grai do kơƀah giăm 300 čô nai pơtô, mơnuih mă bruă amăng sang hră. Ngă tui tơlơi pơkă mơng Jơlan hơdră pơtô hrăm abih bang thun 2018, thun hrăm 2022-2023 amra jing thun blung a hrăm Tơlơi Anglê hăng Tin học jing tơlơi hrăm sit nik, khŏm pơtô hrăm mơng anih 3, lui hĭ ruah mă tơlơi hrăm tui hlâo adih. Tơlơi anai ngă kơ tơring glông kơƀah nai pơtô hơđăp laih, ră anai tơnap hloh dong lơ̆m aka ƀu hơmâo djŏp mrô nai pơtô kơ 2 tơlơi hrăm anai.

“Ră anai, tơlơi tơnap mơng anom bruă pơtô hrăm tơring glông Ia Grai lĕ pơtô hrăm tui hơdrôm hră phrâo hăng tơlơi hrăm Anglê anih 2 hăng tin học anih 3, ră anai glăk kơƀah biă. Hăng nai pơtô tơlơi hrăm Anglê dŏ kơƀah lu amăng sang hră, 5 boh sang hră dong aka ƀu hơmâo nai pơtô tơlơi hrăm Anglê hăng 8 boh sang hră aka ƀu hơmâo nai pơtô Tin học anun jing tơnap biă”.

Pơhlôm hơmâo mrô čơđai djŏp amăng sang hră jing hơdră pơsir kơbah nai pơtô amăng thun hrăm phrâo ƀơi Gia Lai

Ăt amăng thun hrăm anai mơn, plơi prong Pleiku kơƀah rơbêh 600 čô nai pơtô sit nik ƀơi hơdôm gưl hrăm. Ơi Nguyễn Đình Thức - Khua anom bruă pơtô hăng pơjuăt plơi prong Pleiku brơi thâo, kiăng pơhlôm anŏ klă amăng bruă pơtô, hrăm, anom bruă pơtô hăng pơjuăt pơƀut kơ bruă dăp ming, ngă hơđong glăi mrô nai pơtô ƀơi hơdôm boh sang hră, laih dong, kiăo tui mrô nai pơtô sit nik hơmâo jao, iâu pơthưr nai pơtô jăng jai, mơnuih mă bruă dŏ kơƀah.

“Anom bruă hơmâo ngă bruă laih hăng hơdôm boh sang hră lăng glăi anih hrăm, dưm dăp nai pơtô ƀơi hơdôm boh sang hră. Ƀơi anăp bruă kơƀah nai pơtô lu tui anun, jing hơmâo pơhiăp tom laih hăng hơdôm boh sang hră dưm dăp glăi sang hră, anih hrăm, pơmut hrŏm sang hră đah mơng hơmâo aset biă mrô nai pơtô sik nik hơmâo jao. Anom bruă ăt rơkâo hơdôm anom bruă dưi pơsir, sem lăng kiăo tui tơlơi pơtrun mơng anom bruă, mơng kơnuk kơna kiăng hơmâo djŏp mrô nai pơtô ăt kah hăng mơnuih mă bruă amăng sang hră đah mơng dưi pơphun bruă pơtô hrăm”.

Ơi Lê Duy Định - Khua gơnong bruă pơtô hăng pơjuăt tơring čar Gia Lai brơi thâo: Gơnong bruă pơtô hăng pơjuăt glăk ngă hrŏm hăng Gơnong bruă čar ngă bruă hăng hơdôm boh tơring čar sem lăng, jŭ yap glăi, pơphô bruă kơ Jơnum min mơnuih ƀon sang tơring čar pơsit bruă pơpha hyu nai pơtô, wơ̆t hăng dăp glăi sang hră, pơmut hrŏm hơdôm boh sang hră anet, pơđĭ tui mrô čơđai amăng sa boh sang hră kiăo tui tơlơi pơkă ƀơi djŏp gưl hrăm. Tơdơi kơ ngă giong hơdôm tơlơi anai kah mơng jŭ yap glăi bruă kơƀah, djŏp nai pơtô ƀơi hơdôm tơring, đah mơng kah pơpha mrô nai pơtô kiăng ruah lĕ 1.244 tui Kơnuk kơna ta jao.

“Hăng hơdôm boh sang hră gưl sa khŏm hơmâo 35 čô čơđai/anih, bơ gưl 2 lĕ khŏm hơmâo 45 čô čơđai/anih. Hơdôm boh tơring glông kiăng pơmut hrŏm sang hră anet ăt kah hăng pơhlôm hơmâo djŏp mrô čơđai amăng sa boh anihb hrăm tui tơlơi pơkă, tui anun amra plai ƀiă kiăng hơmâo lu đơi nai pơtô. Lơ̆m hơmâo pơhrua laih mrô nai pơtô nit nik, wơ̆t hăng bruă pơmut hrŏm hơdôm boh sang hră anet, ăt kah hăng dưm dăp glăi mrô čơđai amăng sa anih hrăm, tui anun bruă pơtô hrăm ƀơi Gia Lai amra hơmâo djŏp nai pơtô, bruă pơtô hăng hrăm amra klă hloh mơn”.

Hoàng Qui: Čih

Siu H’Mai: Pơblang