Anun lĕ kông ty sa ding kơna Tuh pơ alin čem rông Bách Mộc Hợp ƀơi plơi anăn Cây Xoài, să Ia Hla, tơring glông Čư̆ Pưh hăng Kông ty pơčruh ngăn Gia Lai Farms ƀơi Chơ Glong, tơring glông Kông Chro. Mah aka ƀu hơmâo hră pơsit brơi bruă pơgang hơdjă ayuh hyiăng anih dŏ ôh samơ̆ mơ̆ng lơ 25/1/2023 truh ră anai, kông ty Bách Mộc Hợp ăt čem rông 2000 drơi bui ania hăng 30 drơi bui tơnô (bŏng) pioh juă.

Bơ Kông ty Gia Lai Farms aka ƀu hơmâo hră pơsit kơ ayuh hyiăng mơ̆n, samơ̆ hơmâo rông 2.300 drơi bui ania, 37 drơi bui bŏng pioh juă hăng 4.700 drơi ană bui (un). Jơnum min mơnuih ƀôn sang Gia Lai bơtơhmal đŭ prăk rĭm sang bruă anai 320 klăk prăk, laih dơ̆ng brơi pơdơi mă bruă amăng 2 blan. Hlâo kơ anun, Jơnum min mơnuih ƀôn sang tơring čar Gia Lai hơmâo đŭ prăk laih 3 boh sang bruă čem rông hlô mơnong ƀơi să Ia Piơr, tơring glông Čư̆ Prong hăng 1 boh anom bruă ƀơi tơring glông Kông Chro yua kơ ƀu ngă tui djơ̆ hơdră pơgang ayuh hyiăng anih dŏ jum dar.