VOV4.Jarai - Mơguah lơ 1/4, Jơnum pơtruh nao rai tal 22 kơplah wah Quân khu 5 (Khul tơhan mơnuih ƀon sang Việt Nam) hăng Quân khu 1 (Khul ling tơhan ơi pơtao Dêh čar Kur) hơmâo pơphun ƀơi bah amăng jang jar kmar Lệ Thanh (tơring glông Đức Cơ, Gia Lai).

Ƀơi mông jơnum, Anom bruă git gai tơhan Quân khu 5 (Khul ling tơhan Việt Nam) hăng Anom bruă git gai tơhan Quân khu 1 (Khul tơhan ơi pơtao Kur) hơmâo bơkơtuai hăng tŭ ư hrŏm hơdôm tơlơi ngă hrŏm thun 2022. Tui anun, dua bơnah tŭ ư pơtrut hloh dong tơlơi pơtô pơjuăt bruă, pôr pơhing kơ ƀing khua, ling tơhan hăng mơnuih ƀon sang dua boh dêh čar, biă ñu rơnuk hlăk ai thâo hluh dlăm hloh tơlơi gum pơgôp mơng dua bơnah; pơhlôm rơnuk rơnua kơđi čar, hơđong kơjăp mơnuih mơnam ƀơi guai dêh čar; pơgăn bruă mut tơbiă amăng dêh čar ča čot; pơkơdong mơnuih ngă soh găn nao guai dêh čar.

Siu H’Mai: Pơblang