Phường Hoài Nhơn Bắc jing anih hmư̆ hing mơ̆ng tơring čar Gia Lai amăng bruă iâu pơthưr abih bang mơnuih gum pơgang rơnuk rơnua Lŏn ia hăng lu hơbô̆ bruă tŭ yua kah hăng “Pôr pơthâo pơtô lăi klă - Phat kơđi bơmơak, lŏm hĭ tơlơi bơrơdjơ̆, pơsao, hil neč”, “Khul đah kơmơi pơgang plư pleč amăng plang ngui internet”. Năm blan akŏ thun 2026, mơnuih ƀôn sang hơmâo brơi nao 42 tơlơi pơhing yom, djru ba khul apăn bruă pơgang hlâo, pơkơdong glăi ƀing ngă soh hăng pơsir kơđi tơlơi soh ƀơi plơi pla mơtăm. Ơi Trần Hữu Thảo, Khua ping gah, Khua khul pơ ala mơnuih ƀôn sang phường Hoài Nhơn Bắc, tơring čar Gia Lai brơi thâo, bong kjăp rơnuk rơnua amăng plơi pla jing bruă kiăng abih bang anom bruă kơđi čar, rim čô mơnuih gum ngă:  “Tơlơi rơnuk rơnua hơđong kah bơwih ƀong mơ̆ng đĭ, tơlơi hơdip mơ̆ng rim boh sang anŏ mơ̆ng trơi pơđao yâo mơak. Yua hnun, bong kjăp rơnuk rơnua ƀu djơ̆ bruă hơjăn mơ̆ng tơhan kông an ôh, jing bruă ngă mơ̆ng abih bang ƀing ta”.

Ƀơi mông iâu pơthưr, Khua tơhan krên dên Đại tướng ơi Trịnh Văn Quyết bơni kơ hơdôm bruă hơmâo ngă mơ̆ng Ping gah, gong gai hăng mơnuih ƀôn sang phường Hoài Nhơn Bắc, tơring čar Gia Lai amăng bruă abih bang gum pơgang rơnuk rơnua Lŏn ia. Đại tướng pơsit, pơgang rơnuk rơnua Lŏn ia jing bruă mơ̆ng abih bang mơnuih, kiăo tui tơlơi pơtô ba mơ̆ng Ping gah, amăng anun tơhan Kông an yơh phun ñu. Kiăng bong kjăp rơnuk rơnua tañ, mơ̆ng ataih khŏm bong kjăp mơ̆ng phun ñu mơtăm, phun ñu lĕ pran jua mơnuih ƀôn sang. Bruă abih bang gum pơgang rơnuk rơnua Lŏn ia kiăng dưi ngă sit nik, ta khŏm wai lăng tơlơi hơdip mơda mơnuih ƀôn sang, pơhlom brơi abih bang mơnuih leng kơ tŭ mă anŏ klă mơ̆ng bruă đĭ kyar.

Khua anom pơtô bruă Ping gah dêh čar kiăng Gia Lai pơthâo brơi rơđah hloh ƀơi abih bang anih mơtăm, laih dong pok pơhai ngă tŭ yua djŏp hră pơtrun mơ̆ng Gơnong dlông kơ akŏ pơdong kual mơnuih ƀôn sang hơdip klă kiăo tui tơlơi phiăn, rơnuk rơnua hăng thâo rơgơi, laih anun Jơlan hơdră ngă bruă prong Rơnuk rơnua dêh čar; pơplih phrâo bruă pôr pơthâo, kjăp pran, hơđong hơtai boh ƀơi anăp tơlơi pơhing soh sat ƀơi plang internet; ngă hrŏm kơtang hloh plah wah Kông an, Ƀô̆ đô̆i, Jơnum min djŏp djuai ania mơnuih mơnam hăng khul grup; akŏ pơdong khul tơhan kông an jê̆ giăm mơnuih ƀôn sang, lăng yom mơnuih ƀôn sang, thâo hluh, hăng bơwih brơi kơ mơnuih ƀôn sang.

Đại tướng Trịnh Văn Quyết ăt rơkâo tơring čar Gia Lai kơsem min ruah mă phường Hoài Nhơn Bắc lông ngă lăng hơbô̆ bruă “phường xã hội chủ nghĩa”: “Kâo rơkâo tơring čar Gia Lai sem lăng ruah phường Hoài Nhơn Bắc jing sa amăng hơdôm anih kiăng lông ngă lăng phường xã hội chủ nghĩa jing abih bang bơkơnar, ngă pô, kiăo tui phun tơlơi pơkă, mă bruă djơ̆ akŏ tlôn, rơnuk rơnua, thâo rơgơi, đĭ kyar tui hăng Hră pơtrun mrô 18. Ƀing ta sem lăng pok pơhai amăng ƀrư̆ samơ̆ ngă sit, ngă kjăp laih anun hơmâo anŏ ba glăi rơđah rơđông đah mơ̆ng ngă pơ pơkŏn dong”.