Găn rơgao 4 blan pơtop hrăm, hăng pran jua gir run hloh mơng ƀing ling tơhan, sit biă ñu ƀing ling tơhan mut hrŏm pơtop hrăm brơi djop khul grup, bruă pơtop hrăm brơi ba glăi boh tŭ yua. Khua anom pơtô bruă Ping gah gơnong glông lăng yôm pran jua pơtop hrăm abih pran, laih dong rơkâo djop anom bruă đing nao pơhlôm tơlơi suaih pral, pơhlôm ngă klă bruă pơtrui tơhan ƀrô tal hơdor glăi 50 thun hrơi pơklaih rơngai kual Dơnung.

Ơi Nguyễn Trọng Nghĩa lăi pơtong, ƀing khua mua Ping gah, Kơnuk kơna hăng Khul git gai gơnong glông lêng kơ kiăo tui lăng hăng lăng yôm bruă pơtop hrăm brơi ling tơhan hăng khul tơhan mơnuih ƀôn sang mơng hơdôm Khul ling tơhan, kông ang, ƀôn prong Hồ Chí Minh hăng lu ƀon lan amăng đơ đam dêh čar. Tal hơdor glăi anai ƀu djơ̆ kơnong lĕ hrơi mông pơ-ư ang gru grua đôč ôh mơ̆ ăt kiăng pơdah pran đăo gơnang nao kơñ pơgi kơ lŏn ia ta, ling tơhan jai hrơi prong kơtang.