Lơ 7/5, ƀơi ƀôn prong Hải Phòng, Khul tơhan sơlup pơphun ngă lơphet 70 thun Hrơi akŏ pơdong Tơhan sơlup mơnuih ƀôn sang Việt Nam (7/5/1955-7/5/2025) hăng čơkă Miđai Hồ Chí Minh. Khua mir sir ơi Lương Cường, Khua khul wai lăng bruă tơhan - rơnuk rơnua lŏn ia, Khua tơhan blah ngă nao pơhmư̆ hăng brơi Miđai Hồ Chí Minh kơ Khul tơhan sơlup Quân chủng Hải quân. Brơi Miđai Hồ Chí Minh, gơnam pơpŭ yôm biă mă mơ̆ng Ping gah hăng Kơnuk kơna kơ Tơhan sơlup laih anun pơhiăp ƀơi mông jơnum ngă lơphet, pơ ala kơ Khua mua mơ̆ng Ping gah, Kơnuk kơna, Khua mir sir ơi Lương Cường hok mơak pơpŭ bơni hơdôm tơlơi hơmâo ngă truh kih hăng tơlơi pơgôp prong mơ̆ng Tơhan sơlup mơnuih ƀôn sang Việt Nam amăng bruă ngă hơkrŭ hing ang mơ̆ng Ping gah, mơ̆ng djuai ania amăng 70 thun rơgao.

Khua mir sir lăi rơđah, hơdôm thun pơ anăp, kơđi tơlơi ƀơi rŏng lŏn tơnah, amăng kual rơnuk rơnua, ngă hrŏm ăt jing jơlan ngă bruă phun; samơ̆ ăt hơmâo mơn tơlơi tơnap, ƀu thâo hlâo, tơlơi bơkơtưn mơ̆ng hơdôm boh dêh čar pơprong, hơdôm kual hơmâo kơdrưh ăt kơtang kơtit đôč. Khua mir sir lăi pơtong, ia rơsĭ bul pơtâo plao ia rơsĭ jing anih yôm biă mă amăng bruă đĭ kyar bơwih ƀong huă - mơnuih mơnam, mut hrŏm jar kmar, jing anih yôm pơphăn kơ bruă pơgang lŏn ia, tơlơi rơnuk rơnua. Pơhlôm pơgang abih bang ia rơsĭ, bul pơtâo ia rơsĭ dêh čar ta jing tơlơi pơmin pran jua, tơlơi kiăng khăp, jing tơlơi gơgrong bruă mơ̆ng abih bang Ping gah, mơnuih ƀôn sang, ling tơhan, amăng anun hơmâo Tơhan sơlup Việt Nam jing tơhan yôm phun ba jơlan./.