Bruă dưm dăp anai hluai tui hơdôm bôh than kah hăng anih anom jê̆ giăm, hơhrup phiăn juăt, gêh gal bruă rô nao rai, pơhlôm pơgang lŏn ia – rơnuk rơnua plơi pla hăng pơdĭ kyar bơwih ƀong – mơnuih mơnam.

Ƀơi tơring glông Čư̆ Prông, hmâo 18 bôh anom mă bruă čar, tơdơi kơ pơmut hrŏm kơnong kơ dô̆ 6 bôh să; amăng anun să Ia Pia dưi pơdŏng hluai tui dưm dăp pioh hơđong 3 bôh să Ia Pia, să Ia Ga hăng să Ia Vê. Ơi Siu Khlo, Khua git gai Ping gah să Ia Vê, tơring glông Čư̆ Prông brơi thâo, kơnang kơ ngă klă bruă lăi pơhing anun mơnuih ƀôn sang thâo tum djop tơlơi pơhing kơ hơdră pơtrun pơmut hrŏm mơ̆ng tơring čar truh pơ̆ să hăng hơdai nao hơdră gong gai 2 gưl.

 “Lơm kâo nao pơ̆ hơdôm bôh plơi, bưp mơnuih ƀôn sang ăt thâo mơn tơlơi pơmin mơ̆ng gơñu kơ bruă pơmut hrŏm hơdôm bôh ƀirô kơnuk kơna, neh wa tŭ ư hrŏm hăng hơdră pơtrun anai. Biă ñu hơdră pơtrun pơjing hơdră gong gai 2 gưl (lui ƀirô gưl tơring glông). Ƀuh bruă pơmut hrŏm anai yua kơ bôh tŭ yua hrŏm lĕ mơnuih ƀôn sang tŭ ư biă; khut khăt ƀu hmâo gru nam hơngah hơdră pơtrun pơmut hrŏm hơdôm ƀirô, anom bruă. Neh wa dŏng yua biă, tŭ ư hăng amra gum hrŏm hăng Ping gah hăng Kơnuk kơna ta”./.