VOV4.Jarai - Lơ 23/2, tơring čar Gia Lai hơmâo 662 čô mơnuih ƀă klin Covid-19. Anai lĕ mrô mơnuih ƀă klin lu hloh amăng 1 hrơi ƀơi tơring čar dong mơng hrơi hơmâo klin. Tui anun, plơi prong Pleiku lĕ anih hơmâo mrô mơnuih ƀă klin lu hloh amăng tơring čar. Hơdôm tơring glông hơmâo mơnuih ƀă klin lu kiăo tui tlôn lĕ Čư̆ Pah (67 čô), Kbang (58 čô), Čư̆ Prông (50 čô).

Sa čô čơđai ƀơi plơi prong Pleiku arăng mă ia adung pơčrang lăng klin Covid-19

Ơi Nguyễn Đình Tuấn - Kơ-iăng khua gơnong bruă ia jrao tơring čar Gia Lai brơi thâo, ba truh tơlơi anai lĕ yua hlâo hăng amăng hơdôm hrơi ƀong tết, mơnuih glăi pơ tơring čar Gia Lai lu hăng lu mơnuih pơtah tai amăng pơgang klin yua kơ tlâ̆o vaccine laih. Mah mrô mơnuih ƀă klin Covid-19 đĭ lu tui, samơ̆ rơbêh 94% mrô mơnuih ƀă klin ruă rơnang, đa ƀu mưn hơget ôh; mrô mơnuih ruă kraih ƀiă đôč; mrô mơnuih djai ăt aset mơn. Yua anun, mơng lơ 26/4/2021 truh pơ lơ 23/2/2022, tơring čar Gia Lai hơmâo rơbêh 16.900 čô mơnuih ƀă virus Sars-Cov2. Ră anai hơmâo 45 čô mơnuih djai hăng dŏ glăi rơbêh 1.400 čô mơnuih glăk dŏ pơjrao ƀơi hơdôm sang ia jrao amăng tơring čar.

Siu Đoan: Pơblang