Rơđah biă mă ñu, ƀơi tơring čar Gia Lai hơmâo 674 boh sang man pơdong phrâo hlăk dŏ ngă, lu biă mă yua sang răm kơthel 13 ngă. Abih bang mrô sang anun dưi man pơdong phrâo. Hlâo kơ anun, tui hăng tơlơi jŭ yap hơmâo 451 boh sang răm abih yua kơ kơthel ngă hăng ia ling dăo truh.

Hơdôm sang dŏ glăi amăng kual pơdong plơi pla, hơmâo laih anih pơdong sang anun hlong pok pơhai ngă tui. Tơring čar Gia Lai ƀuăn ngă giong sang phrâo anai hlâo kơ lơ 25/1/2026. Bruă man pơdong sang anun, hlăk ngă tui hmar hăng hmao kru. Khua mua jơnum min mơnuih ƀôn sang tơring čar Gia Lai brơi thâo, tơlơi anai hơmâo hlong pơphun ngă tui tơdơi kơ kơthel tal 13, lơ̆m tơring čar čih anăn hơdôm sang tơ̆i sang phŏ amăng kual hơmâo tơlơi truh răm ƀăm kơtang ia ling dăo ngă, anun huăi rơngiă lu mông ngă hră pơar pioh man pơdong phrâo. Tơring čar Gia Lai pơhlom djop rơnoh prăk mă yua hăng mơnuih mă bruă kơnang kơ dêh čar djru, hrŏm hăng mơnuih mơnam djru ba hrŏm, mơ-it kơ Jơnum min djop djuai ania mơnuih mơnam Việt Nam hăng lu rơnoh prăk pơkŏn. Hrŏm hăng anun rơnoh prăk sit nik, ling tơhan hăng kông an gơgrong ba phun djru man pơdong sang hăng pơdŭ pơgiăng gơnam yua mă bruă.