Hlâo anun, tơring čar brơi 16 anom bơwih ƀong sĭ mơdrô pok pơhai 44 akŏ bruă hăng đơ đam rơbêh 25.500 ektar. Samơ̆, truh ră anai hơmâo giăm 7.900 ektar (giăm 1/3) pơđĭ kyar hiam, lu hloh lĕ djai ƀudah ƀu hiam ôh. Lu anom bơwih ƀong rơkâo pơplih hĭ kual pla kyâo ƀu hiam hơdai nao pla boh troh, rông hlô samơ̆ ăt gun amăng bruă ngă hră pơ-ar hăng bơdjơ̆ nao bruă pla glai plih hĭ.

Khua Jơnum min mơnuih ƀôn sang tơring čar Gia Lai jao gơnong bruă ngă hmua hăng ayuh hyiăng lŏn mơnai gum hrŏm hăng hơdôm gơnong bruă bơdjơ̆ nao pơsit tong lŏn mơnai, gơnam pla, yua hơget pla ƀu hiam hăng rơkâo pơplih lăp djơ̆ hăng anih dưm dăp, ba glăi tŭ yua. Laih dong, kiăng ĕp lŏn brơi glăi ƀon lan, pơgôp pơsir hĭ bruă kơƀah lŏn ngă hmua brơi mơnuih djuai ania ƀiă.