VOV4.Jarai - Amăng hrơi blan laih rơgao, lơ̆m ƀuh neh met wa djuai ania ƀiă ƀu thâo phe pho hăng tơlơi hơdip bưp tơnap tap ƀơi să Čư̆ Dang Ya, tơring glông Čư̆ Pah, tơring čar Gia Lai, sa, dua čô mơnuih nao plư hăng sua mă lŏn mơnai. Sit biă ñu, ƀuh lu bruă ngă soh lơ̆m ƀing pô anai ngă hră pơ-ar jao glăi lŏn mơnai kơ mơnuih tal 3 dong ƀudah ngă hră pơ-ar čan prăk sang bruă prăk, yua anun ba truh kơ tơlơi tơnap pơsir hĭ.

Hăng ƀô̆ mơta hning rơngŏt, amai Kưm (thun tơkeng 1978, dŏ ƀơi plơi Xoá, să Čư̆ Dang Ya, tơring glông Čư̆ Pah, tơring čar Gia Lai) brơi thâo, ñu glăk bơngŏt yua kơ hŭi rơngiă 5 ar hmua pla kơphê kơ arăng. Amai Kưm bơră ruai tom, thun 2018, yua kơ kiăng prăk tuh pơ alin bơwih ƀong huă, dua rơkơi bơnai ñu tŭ ư brơi sa čô mơnuih ha plơi lĕ yă Vũ Thị Hằng ngă apah lŏn hmua sang anŏ ñu sui 10 thun, hăng nua lĕ 100 klăk păk. Lơm anun, yă Hằng hơmâo brơi dua rơkơi bơnai ñu kĭ sa, dua pok hră pơ-ar kiăng  pơkôl kơ bruă yua lŏn. Ñu pơmĭn tơdơi kơ 10 thun amra mă glăi lŏn, samơ̆ truh blan 1/2022, lơ̆m ƀing apăn bruă mơng Anom bruă wai lăng lŏn mơnai tơring glông Cư̆ Pah nao pơ sang sem lăng, ñu kah mơng thâo lŏn hmua ñu hơmâo ngă hră pơ-ar sĭ brơi yă Hằng dong mơng blan 8/2020, ră anai pô anai glăk ngă hră pơ-ar sĭ brơi mơnuih tal 3 dong.

“Kâo pơmĭn ăt ruă akŏ biă mă, mơmŏt mlăm pit đih ƀu hơ-et. Kâo brơi pô anai ngă apah đôč, mơ̆ lăng glăi jing sĭ brơi kơ ƀing gơñu, kâo ăt ƀu thâo ngă hiưm pă lơi. Ƀing gơñu iâu adơi tơlŭi, amĭ ama nao glit kru tơngan, ngă glăi hră pơ-ar jing kâo ăt ƀu thâo lơi. Ră anai ƀing gơñu ƀuăn ngă glăi hră pơ-ar čih anăn kâo. Tơdah yă Hằng ƀu ngă hră pơ-ar čih glăi anăn kâo, kâo amra ba nao phat kơđi pơ să adih mơtăm”.

Sang anŏ amai Kưm glăk bơngŏt yua hŭi rơngiă 5 ar lŏn hmua

Ƀơi plơi Xoá, sang anŏ ayong Chang (thun tơkeng 1981) ăt bơngŏt mơn kơ lŏn sang ñu prong 300 m2. Yua thun 2020, sang anŏ ñu jao hră pơ-ar lŏn sang, kiăng kơ amai Hằng djru čan prăk sang bruă prăk. Mơng anun truh ră anai, sang anŏ ayong Chang aka mă prăk čan, mơ̆ hră lŏn sang ăt ƀu ƀuh brơi glăi. Truh pơ rơnuč blan 2/2022, lơ̆m hơmâo ƀing mơnuih ƀu thâo mơng pă nao pơ sang gơñu rơkâo tla glăi hnưh 140 klăk prăk, dua rơkơi bơnai ñu kah mơng thâo hră lŏn sang kơ sang anŏ ñu yua yă Hằng ba nao čan prăk laih:

“Arăng rai tơña hnưh, lăi sang anŏ gơmơi khŏm tla glăi 140 klăk prăk kah dưi mă glăi hră lŏn sang. Kâo lăi glăi sang anŏ aka ƀu mă prăk čan anai. Kâo tui nao pơ sang yă Hằng, ñu lăi amra tla glăi, yua prăk čan yă Hằng mă abih yơh, yua anun ñu amra tla glăi hnưh đom, hăng mă glăi hră lŏn sang. Kâo ăt bơngŏt biă mă mơn, ƀong ƀu mut, pit đih ƀu hơ-et. Tơdơi anun kâo lăi pơthâo brơi kơ khua plơi, mơ̆ aka ƀu lăi pơthâo kơ gong gai ôh”.

Dua rơkơi bơnai ayong Chang, ƀơi plơi Xoá, să Čư̆ Dang Ya, Čư̆ Pah

Ơi Hoàng Anh Tuệ - Khua anom bruă wai lăng lŏn mơnai tơring glông Čư̆ Pah, tơring čar Gia Lai brơi thâo, amăng thun 2021, yă Vũ Thị Hằng hơmâo lu wŏt ngă hră pơ-ar brơi arăng mă lŏn mơnai hăng mrô lŏn anai lêng aka ƀu hơmâo hră pơ-ar ôh. Akŏ thun 2022, yă Hằng ngă hră pơ-ar lŭ wŏt kiăng kơ čan prăk sang bruă prăk hăng jao glăi mơnuih tal 3 mă yua lŏn. Ƀuh hơmâo lu tơlơi ngă soh, anom bruă hơmâo nao pel ĕp ngă rơđah 4 bruă anai ƀơi să Čư̆ Dang Ya, 4 boh sang anŏ anai lêng kơ lăi pơthâo ƀing gơñu ƀu hơmâo sĭ lŏn ôh. Tui hăng ơi Hoàng Anh Tuệ, yua kơ bruă anai amra bơbeč sat nao tơlơi dưi kơ mơnuih ƀon sang, yua anun anom bruă hơmâo hră pơ-ar rơkâo Jơnum min mơnuih ƀon sang djop să kiăng gơgrong djru brơi mơnuih djuai ania ƀiă amăng bruă brơi arăng yua lŏn đang hmua.

“Hăng hơdôm să kual mơnuih djuai ania ƀiă, ƀing apăn bruă gah anom bruă phiah phiăn să kiăng gơgrong, glăm ba. Lơ̆m ngă tui hơdôm tơlơi dưi brơi mơnuih ƀon sang rơkâo dua bơnah pơđok tong ten tơlơi pơkôl, tơña rơđah brơi arăng yua lŏn hă ƀŭ ? laih dong lăi pơtong kiăng sĭ lŏn anai brơi arăng hă ƀŭ ?. Tơdah neh met wa djuai ania ƀiă ƀu thâo tơlơi yuăn khŏm rơkâo ƀing apăn bruă mơnuih djuai ania ƀiă pơblang brơi tơlơi djuai ania kiăng ƀing gơñu thâo rơđah”.

Ơi Nguyễn Văn Nội - Khua Jơnum min mơnuih ƀon sang să Čư̆ Dang Ya, tơring glông Čư̆ Pah brơi thâo, ră anai, gong gai ƀon lan hăng djop khul grup glăk pel ĕp, ngă rơđah bruă ngă hră pơ-ar sĭ lŏn mơnai amăng thun blan giăm anai, laih dong gum hrŏm pơtô pơblang brơi mơnuih ƀon sang rang kơđiăng ƀiă dong lơ̆m jao lŏn brơi arăng mă yua:

“Lơ̆m ƀuh bruă anai, ƀing gơmơi hơmâo rơkâo kông ang hăng hơdôm anom bruă, khul grup nao tơl rĭm boh sang anŏ amăng djop plơi pla, pơtrut pơsur djop sang anŏ kiăng kơ hŭi ƀuh arăng plư sua mă lŏn đang hmua”.

Tơdơi kơ hmư̆ hing, ră anai Jơnum min mơnuih ƀon sang tơring glông Čư̆ Pah, tơring čar Gia Lai rơkâo djop anom bruă pơdơi hĭ bruă ngă hră pơ-ar kiăng kông ang pel ĕp, ngă rơđah hơdôm bruă sĭ mơdrô lŏn mơnai ča čot bơdjơ̆ nao mơnuih djuai ania ƀiă ƀơi să Čư̆ Dang Ya.

Siu Đoan: Pơblang