VOV4.Jarai - Amăng hơdôm hrơi ania tơring čar Gia Lai glăk amăng bơyan không phang, lu anih arăng pơhŭi hlâo amra ƀuh apui ƀong glai hăng ba glăi tơlơi hŭi rơhyưt biă mă. Kiăng kơ pơgang hăng pơgăn huăi ƀuh apui ƀong glai, ling tơhan wai lăng glai tơring čar Gia Lai hơmâo gum hrŏm kjăp hăng ƀing mơnuih arăng jao wai lăng glai gơgrong wai pơgang, pơgăn hŭi kơ apui ƀong glai tui hăng tơlơi pơsit “4 mơta ha anih”.

Grup sang anŏ ơi Phạm Đăng Ngọc, dŏ ƀơi tơring kual Kon Dơng, tơring glông Mang Yang glăk hơmâo arăng jao wai lăng 250 ektar glai rưng gah kual glai rưng Mang Yang, sa amăng hơdôm anih amuñ apui ƀong glai. Amăng hơdôm hrơi anai, rơngiao kơ bruă wai pơgang, grup sang anŏ mơng ơi Ngọc ăt mut hrŏm hăng ling tơhan bơdjơ̆ nao hyu tir amăng glai rưng hăng čuh pơƀut hĭ hla kyâo krô hŭi ngă đet hyu apui. Laih dong, grup sang anŏ mơng ơi Ngọc ăt gơgrong pơtô pơblang, pơtrut pơsur mơnuih ƀon sang anăm phă glai kyâo, jong jơnah jah glai ngă đang hmua giăm hơdôm kual glai rưng arăng wai pơgang.

“Ngă tui bruă wai pơgang glai rưng tui arăng jao ƀing gơmơi hơmâo akŏ pơjing hơdôm grup juăt pơplih nao rai amăng bruă wai lăng, pơgang hŭi apui ƀong glai amăng bơyan không phang anai. Hrŏm hăng anun hrŏm hăng ling tơhan wai lăng hyu tir hơdôm kual glai mơ̆ ƀuh lu hla kyâo krô kiăng kơ pơƀut čuh hĭ hŭi kơ ngă apui đet lar hyu amăng bơyan không phang anai”.

Ơi Nguyễn Văn Hùng, Khua anom bruă wai lăng glai rưng Mang Yang brơi thâo, anom bruă juăt gum hrŏm kjăp hăng hơdôm anom bruă bơdjơ̆ nao amăng tơring čar kơtưn amăng bruă hyu tir, wai lăng, pơsir hĭ hơdôm bruă ngă sôh amăng tơlơi phiăn wai pơgang đang glai. Pơkiăo nao ling tơhan wai lăng tơhrơi kah hăng mlăm kiăng kơ tañ thâo tơdah ƀuh apui ƀong, mơng anun hmao tlôn ba tơhan nao prah apui. “Anom bruă wai lăng glai rưng Mang Yang hơmâo pơkiăo nao abih bang tơhan hyu tir amăng bơyan không phang anai. Hrŏm hăng hơdôm sang anŏ arăng jao wai lăng, neh met wa amăng plơi pla ƀuăn wai ƀu brơi apui ƀong glai, ƀu hrơi apui lar hyu amăng glai rưng. Laih anun dong hrŏm hăng ƀing gơmơi ngă tui hơdôm ring bruă amăng glai rưng, pơƀut čuh hĭ hla kyâo krô, plai ƀiă gơnam amuñ ngă apui ƀong amăng bơyang không phang”.

Grup sang anŏ arăng jao wai lăng glai rưng pơƀut čuh hĭ hla kyâo, asuk ruk krô kiăng pơgang hŭi apui ƀong glai

Tơring glông Mang Yang ră anai hơmâo rơbêh 47.000 ektar glai rưng, amăng anun, rơbêh 40.000 ektar glai rưng sô hơđăp hăng rơbêh 7.400 ektar glai arăng pla. Mơng pel ĕp, đơ đam tơring glông hơmâo rơbêh 6.000 ektar glai rưng lĕ sô hơđăp ƀơi 6 kual amuñ apui ƀong hơmâo: Ayun, H’Ra, Đăk DJrăng, Đê Ar, Đăk Trôi, Kon Chiêng.

Ơi Trần Tất Đắc, Kơ-iăng khua anom bruă wai lăng glai rưng tơring glông Mang Yang brơi thâo, kiăng kơ gơgrong amăng bruă pơgang apui ƀong glai, mơng akŏ bơyan không phang mơtăm, ƀon lan hơmâo hơdră bruă kơ Khul git gai pơgang apui ƀong glai gưl să, tui anun hơmâo akŏ pơjing hơdôm khul grup pơgang apui ƀong glai hăng 4 mơta ha anih.

“Anom bruă wai lăng glai rưng lĕ anom bruă gum hrŏm hăng hơdôm anom bruă kông ang tơring glông, anom wai lăng glai rưng hăng hơdôm anom bruă bơdjơ̆ nao amăng tơring glông, anom bruă ngă hmua kiăng kơ pel ĕp hơdôm anom bruă wai lăng glai hăng hơdôm să. Anom bruă wai lăng glai hơmâo pel ĕp hăng kơtưn amăng bruă pơtô pơblang amăng 12 boh să, tơring kual, hrŏm hăng 4 boh kông ti Khul wai lăng glai rưng, Đang glai dêh čar Kon Ka Kinh pok pơhai bruă pơtô pơblang, pơtrut pơsur bruă wai pơgang glai rưng, bruă pơgang hŭi apui ƀong glai”.

Gia Lai ră anai hơmâo rơbêh 226.000 ektar glai rưng amuñ apui ƀong, samơ̆, amăng mrô anai phrâo hơmâo ha mơkrah đang glai hơmâo tŭ pơ alin man pơkra hơdôm ring bruă pơgang prah apui. Yua anun, bruă pơgang, prah apui amăng tơring čar mơng anai truh rơnuč bơyan không phang lêng kơ hơmâo anom bruă bơdjơ̆ nao gir run ngă kiăng kơ pơhlôm hlâo tơdah hơmâo tơlơi truh sat. Ơi Trương Văn Nam, Khua anom bruă wai pơgang glai, Anom bruă wai lăng glai tơring čar Gia Lai brơi thâo:

“Anom bruă wai lăng hơmâo git gai khut khăy hơdôm anih anom hăng ƀing mơnuih arăng jao wai lăng glai ngă klă bruă pơgang apui ƀong glai tơhrơi kah hăng mlăm. Hơmâo pơphun giăm 250 km glông wai pơgang hăng 700 ektar đang glai hơmâo pơƀut čuh hla kyâo krô hŭi ngă apui đet hyu, kiăng kơ plai ƀiă ƀuh apui ƀong glai amăng tơring čar. Laih dong anom bruă wai lăng glai ƀơi ƀon lan, tơhan bơdjơ̆ tơdah ƀuh hơmâo anih apui ƀong khŏm nao prah hĭ mơtăm yơh”.

Siu Đoan: Pơblang