Ƀơi mông jơnum, ƀing pơ ala hơdôm anom bơwih ƀong Việt Nam hăng čar Khač hơmâo pơčrông sai hơdră đĭ kyar hăng pơhlôm hơđong kjăp bruă ba sĭ gơnam pơ anăp anai. Amăng anun, anom bơwih ƀong Việt Nam čang rơmang kiăng djru tañ thâo djŏp tơlơi pơtrun, tơlơi pơkă gah kĭ thuâ̆t, tơlơi pơkă phrâo hăng hơnong pơkă hơdjă rơgoh rơnuk rơnua mơnŏng ƀong huă phrâo mơ̆ng dêh čar Khač. Laih dong hơmâo glông pơhiăp nao rai na nao kiăng tañ thâo tơlơi pơplih pơkra gơnam.

Gah dêh čar Khač, lu anom bơwih ƀong lăi tơring čar Gia Lai kiăng kơđiăng nao hloh kơ anŏ hơđong mơ̆ng anih pơkra gơnam, anŏ klă dưm kơnar hăng tơlơi dưi pơkra gơnam dlăm, klă hloh kiăng nua pơmă. Yă Lư Lệ Phương, Khua sĭ mơdrô Grup tuh pơ alin Vịnh Bắc Bộ (tơring čar Quảng Tây, dêh čar Khač) brơi thâo:“Hăng anom bơwih ƀong dêh čar Khač, lăng nao yôm biă kual pơkra gơnam hăng gơnam mơ̆ng Việt Nam. Hơmâo lu mơta gơnam. Hrơi anai, pơ anăp anai, kâo kiăng hơduah ĕp thim kual pơkra gơnam mơ̆ng Việt Nam, bruă ngă hiư̆m pă, bruă wai lăng gơnam ba sĭ pơ čar rơngiao hiư̆m pă. Tơdah kiăng hơmâo lu gơnam ba sĭ pơ čar Khač lĕ khŏm hơmâo anom bruă krăp lăng, pơkra gơnam, pioh gơnam amăng hruh rơđah rơđông”.

Ƀơi mông jơnum, hơdôm bơnah tŭ ư prong biă kơ bruă kiăng akŏ pơjing anih pơtruh nao rai ƀơi anăp, plai ƀiă hơmâo pô pơkŏn pơtruh brơi ngă gong jơlan, laih dong pơtrut ngă hrŏm gah logistics. Yă Nguyễn Thị Diễm Hằng, Khua kông ti pơčruh ngăn Vinanutrifood Bình Định, brơi thâo, ră anai hơmâo lu anom bơwih ƀong Việt nam mut dlăm tui amăng anih sĭ mơdrô dêh čar Khač, laih anun thâo hluh rơđah hră pơ-ar blơi mut gơnam bơdjơ̆ nao. Anai jing tơlơi gêh gal prong či đĭ kyar kual pla gơnam djơ̆ hơnong pơkă ƀơi Gia Lai:“Ƀing gơmơi thâo laih tơlơi yôm hloh lĕ anŏ rơđah rơđông mơ̆ng wai lăng kual pla truh kơ sang măi pơkra gơnam. Yôm hloh lĕ ƀing ta sĭ gơnam mơ̆ gah dêh čar Khač ñu kiăng. Gơmơi mă yua boh thâo AI, ba pơmut tơlơi pơhing hră pơ-ar mơ̆ng hơdôm glông pôr pơhing mơ̆ng dêh čar Khač, hơdôm tơlơi đao lăng bơyan tơjŭ pla pĕ pơhrui tañ, blan tơjŭ pla kơ mrô gơnam pơhrui glăi pơmut hrŏm hăng kual pla gơnam ƀơi Việt Nam či ba hơdôm mơta gơnam djơ̆ bơyan hăng djŏp mrô gơnam ba sĭ pơ anih sĭ mơdrô”.

Ƀơi mông jơnum, hơmâo 7 pok hră kĭ ngă hrŏm kơplah wah anom bơwih ƀong Gia Lai hăng anom bơwih ƀong dêh čar Khač. Ơi Nguyễn Tuấn Thanh, Kơ-iăng khua Jơnum min mơnuih ƀôn sang tơring čar Gia Lai pơsit, tơring čar glăk pơƀut ngă giong abih djŏp tơlơi pơkă kiăng hơmâo anih sĭ mơdrô gêh gal kơ anom bơwih ƀong, amăng anun hơmâo anom bơwih ƀong tuh pơ alin mơ̆ng čar rơngiao, anom bơwih ƀong dêh čar Khač:“Tơring čar Gia Lai lăng yôm bruă man pơkra klă jơlan nao rai ƀơi tơring čar, man pơdong anih anom sang măi pơkra gơnam, bruă pơplih hră pơ-ar tuh pơ alin man pơkra, prăk jia, rô nao rai pơ čar rơngiao. Rai pơ Gia Lai, hơdôm anom bơwih ƀong, ƀing tuh pơ alin amra hơmâo tơlơi gêh gal či ngă truh kih djŏp bruă bơwih ƀong hăng pơđĭ kyar kjăp”.

Ră anai, Gia Lai hơmâo giăm 1 klăk ha lŏn ngă hmua hăng lu kual pla sa djuai phun prong biă. Amăng anun, kơphê jing phun hơmâo pla lu hloh, hăng rơbêh 107.000 ha, pơhrui rim thun hơmâo rơbêh 333.000 tơn. Djŏp djuai phun kah hăng sâu riêng, tiu, boh ñông (boh kueo), kơsu, pơtơi, boh kruăi hrĕ, hơbơi čên, pơđung, pơhăng...ăt hơmâo lu mơn, mơ̆ng hơdôm rơbâo truh kơ hơdôm pluh rơbâo ha, dưi ba sĭ pơ čar rơngiao./.