VOV4.Jarai - Bruă sĭ mơdrô ƀañ amăng bơyan blan bơrơmi ƀơi Gia Lai ăt dik dak hăng lu mơta ƀañ ƀong hiam hơdjă. Thun anai, hơdôm sang măi pơkra pơjing ba sĭ mơdrô lu mơta ƀañ mơng ƀañ rơgêh truh kơ pơmă, djơ̆ hăng tơlơi kiăng mơnuih ƀon sang.

Thun anai, bruă sĭ mơdrô ƀañ amăng bơyan blan bơrơmi pok tañ ƀiă. Mơng akŏ blan 7 tui blan di, lu anih anom sĭ mơdrô ƀañ anun lĕ Kinh Đô, Yến sào Khánh Hòa, Richy … hơmâo pơdong hơdôm anih sĭ mơdrô rok tui jơlan pơprong amăng plơi prong Pleiku, pơhưč lu tuai nao blơi gơnam. Rĭm thun, ƀañ blơi mut mơng Malaysia, Đài Loan hơmâo ba sĭ mơdrô hrŏm. Hơdôm thun anai. Lu anih sĭ lu hloh hơdôm ƀañ pơkra amăng lŏn ia ta. Nua sĭ mơdrô ƀañ amăng bơyan blan bơrơmi thun anai mơng 280.000 prăk truh pơ 480.000 prăk amăng sa hruh ƀañ, hơdôm ƀan jơman pơkŏn nua mơng 560.000 truh pơ 1 klăk 700 rơbâo prăk.

Mơnuih ƀon sang ĕp ƀañ či blơi amăng bơyan blan bơrơmi ƀơi plơi prong Pleiku, Gia Lai

Tui hăng amai Bùi Thuý Oanh - anih sĭ mơdrô Thuý Oanh, phường Diên Hồng, plơi prong Pleiku, rơngiao kơ bruă hơmâo lu mơta ƀañ ƀong amăng bơyan blan bơrơmi thun anai, nua sĭ mơdrô tơpung pơkra ƀañ ăt đĭ ƀiă pơhmu hăng rĭm thun.

“Tui hluai tuai kiăng. Pơhmutu ƀañ dưm amăng hruh pioh pơyơr arăng nua sĭ ñu pha, bơ hơdôm ƀan sĭ tui hluai kiăng nua ñu pha mơn. Nua sĭ thun anai đĭ ƀiă, đa hơmâo ƀañ kơnong sa rơtuh hăng đa hơmâo hruh ƀan nua hơdôm rơtuh”.

Amai Bùi Thị Lành, pô sang sĭ mơdrô ƀañ Yến Sào Khánh Hòa (ƀơi 127 Phan Đình Phùng, plơi prong Pleiku) brơi thâo, anih ñu sĭ mơdrô hơmâo 10 mơta ƀañ ƀong amăng bơyan blan bơrơmi hăng nua ñu mơng 65.000 truh pơ 110.000 prăk sa boh ƀañ, mơng 148.000 truh pơ 657.000 prăk sa hruh ƀañ djop mơta, hruh ƀañ ƀong jơman hloh nua ñu mơng 1 klăk 2 rơbâo truh 1 klăk 700 rơbâo prăk. Ăt tui amai Lành mơn, thâo mơnuih ƀon sang hor hơget, thun anai amai Lành hơmâo dong sa, dua ƀañ phrâo kiăng kơ mơnuih ƀon sang dưi ruah tui pran hor.

“Thun anai kâo sĭ dong 2 mơta ƀañ phrâo, amăng lăm dưm lu mơta, samơ̆ hơmâo wŏt phô mai dong, lơ̆m ta ƀong ñu rơmoăn hăng ƀâo mơngưi mơng ia če”.

Anom bruă wai lăng sĭ mơdrô tơring čar Gia Lai hơmâo git gai hơdôm grup wai lăng sĭ mơdrô kơtưn amăng bruă pel ĕp tơpung pioh pơkra ƀañ ƀong amăng bơyan blan bơrơmi, čih rơđah anih pơkra. Hrŏm hăng anun pơsir hĭ hơdôm bruă pơkra pơjing, sĭ mơdrô gơnam pơkra mă ča čot, ƀañ ƀu hiam hơdjă, aka ƀu thâo tong ten anih pơkra, ƀu pơhlôm hơdjă brơi kơ mơnuih ƀon sang yua amăng bơyan blan bơrơmi anai. Ơi Lê Hồng Hà, Khua anom bruă wai lăng sĭ mơdrô tơring čar Gia Lai brơi thâo:

“Mơng hrơi anai mơtăm ƀing gơmơi hơmâo pơphun bruă pok pơhai pel ĕp, wai lăng hơdôm bruă bơdjơ̆ nao bơyan blan bơrơmi 2022 kiăng pơgăn kơ bruă ƀañ ƀong amăng bơyan bơrơmi ƀu tong ten anih anom pơkra pơjing bơbeč nao tơlơi suaih pral kơ mơnuih ƀon sang. Laih dong kơtưn pel ĕp hăng abih bang gơnam bơdjơ̆ nao mơnong ƀong huă lăi hrŏm kiăng kơ hmao tlôn ĕp ƀuh hăng pơsir hĭ hơdôm bruă ngă soh mơng ƀing mơnuih, khul grup sĭ mơdrô amăng tơring čar kiăng pơhlôm brơi tơlơi dưi kơ mơnuih ƀon sang”.

Hoàng Qui: Čih

Siu Đoan: Pơblang