Tui hăng Khul khua git gai brơi jak iâu pơyơr drah hăng tơlơi khăp pap ƀơi Gia Lai, mơ̆ng akŏ thun truh ră anai, đơ đam tơring čar hơmâo pơphun 45 wơ̆t tŭ mă drah pơyơr, pơhrui glăi 9 rơbâo kơdŭng drah, dưi ngă djop 57% akŏ bruă mơ̆ng Khul git gai dêh čar jao kơ bruă pơyơr drah. Amăng Hơdră bruă tal anai, Khul git gai brơi tŭ mă boh ƀiă 600 kơdŭng drah djru hrŏm bruă pơjrao mơnuih duăm ruă amăng bơyan pơdơi prong.

Ƀrô djơ̆ tal anai, Khua Jơnum min mơnuih ƀôn sang tơring čar Gia Lai ƀơk hră apah bơni kơ 5 grup, 7 čô mơnuih hơmâo ngă lu bruă hiam pơyơr drah thun 2022-2023. Khul git gai jak iâu pơyơr drah ƀơk hră apah bơni kơ 12 khul, anom bruă, 8 boh sang anŏ, 28 čô mơnuih hơmâo ngă klă bruă jak iâu pơyơr drah hăng tơlơi khăp pap.