VOV4.Jarai - Tlam lơ 12/8, Hrơi abih bang mơnuih ƀon sang pơgang rơnuk rơnua Lŏn ia thun 2022 hơmâo tơring čar Gia Lai pơphun ƀơi 2 boh tơring glông Čư̆ Pah hăng Phú Thiện. mơng akŏ thun truh ră anai, ƀơi tơring čar Gia Lai, mơnuih ngă soh kơđi prong tơdu trun laih kơ mrô tơlơi soh, mrô mơnuih djai hăng mrô mơnuih ruă. Amăng anun, phăt kơđi tơlơi soh prong hơmâo 93,5%. Bruă akŏ pơdong abih bang mơnuih ƀon sang gum pơgang rơnuk rơnua Lŏn ia ƀu pơdơi pơdă pơplih phrâo amăng djŏp bruă mă, ngă pơhưč lu mơnuih ƀon sang gum ngă.

Khua kông an tơring čar Gia Lai brơi hră bơni kơ ƀing gum ngă bruă ƀơi tơring glông Čư̆ Pah

Truh ră anai, tơring čar hơmâo laih 550 wơ̆t ƀut plơi pla, plơi pla, sang hră, anom bruă kơnuk kơna, anom bơwih ƀong hăng rơbêh 50.450 čô mơnuih gum hrŏm, djru tom ling tơhan, pơkơdong glăi mơnuih ngă soh; pơhlôm rơnuk rơnua hơđong kơjăp. Amăng hrơi blan pơ anăp anai, Anom git gai pơgăn mơnuih ngă soh hăng akŏ pơdong bruă abih bang mơnuih ƀon sang pơgang rơnuk rơnua Lŏn ia tơring čar Gia Lai čang rơmang hơdôm anom bruă, tơring glông pơđĭ tui dong bruă anai; hyu iâu pơthưr mơnuih ƀon sang gum pơhlôm pơgang, pơkơdong glăi tơlơi pơmin soh glăi, pơčut pơčao mơng ƀing ƀu klă; pơgăn tơlơi ngă soh; gum pơgôp djuai ania kơjăp hloh.

Siu H’Mai: Pơblang