Ƀơi sang sĭ mơdrô prong siêu thị Co.opMart Plei Ku, tơring čar Gia Lai, bruă mut blơi gơnam tam ik ăk, kơdor kơdor mơtam. Lu anih sĭ mơdrô, čơgăn dăp gơnam sĭ mơdrô dăp lui hơbôt hyôt, agaih gông djop mơta dơ̆ng mơ̆ng mơnong ƀong huă, gơnam yua amăng sang anŏ truh pơ mơnong ƀong huă či pioh pơđom lui amăng sang anŏ hơmâo soh. Rim kơ gơnam sĭ mơdrô hơmâo sem lăng tong ten hlâo kơ ba dưm pơ tơrưng pra dăp gơnam, kiăng lăi pơthâo tong ten phun tơdŭ, anih pơkra ming rơđah rơđong. Yă Châu Hoàng Thy, Kơ-iăng khua sang bruă sĭ mơdrô siêu thị Co.opMart Plei Ku lăi:

“Ƀơi siêu thị gơnam sĭ mơdrô lu mơta hăng hiam klă soh, djop gơnam sĭ mơdrô mơ̆ng sang bruă pơkra ming ba nao pơdă lĕ lêng kơ gơnam sĭ mơdrô djơ̆ hơnơ̆ng pơkătong ten ISO 9000, hơdôm gơnam hmư̆ hing pơhlôm anŏ klă, hơdjă rơgoh. Ƀing gơmơi ăt pơgang tơlơi dưi mơ̆ng mơnuih blơi yua, wai lăng klă anŏ hơdjă rơgoh hiam klă, ƀului gơnam pơkra ming ƀĕp ƀop, răm hĭ, khom kĭ hră pơkôl hăng anom sĭ mơdrô pơkra ming lăi pơthâo hră pơsit tong ten mơ̆ng anom bruă kơnuk kơna hơmâo tơlơi dưi ngă brơi”.

Ƀu kơnong ƀơi sang sĭ mơdrô prong siêu thị đôč ôh, khom pơhlôm rơđah tong ten gơnam sĭ mơdrô ăt dưi hơmâo ƀing ngă bruă sĭ mơdrô pơ sang anŏ hai ăt đing nao soh. Amai Trần Thị Kim Huế, pô sang sĭ mơdrô gơnam anăn Sơn Huế ƀơi tơring kual Čư̆ Ty, tơring glông Đưk Kơ, pơdah pran jua čang rơmang khua mua, ling tơhan amăng kơnukkơna khom ĕp lăng tong ten anih blơi sĭ mơdrô gơnam online hăng gơnam sĭ mơdrô ba rai mơ̆ng guai dêh čar pioh pơgang ba mơnuih sĭ mơdrô ngă djơ̆ tơlơi phiăn pơkă.

“Kâo sĭ mơdrô gơnam mơ̆ng kông ty jao soh, hơmâo hră pơar pơhlom hơdjă rơgoh, hơđong mơnong ƀong huă, hră pơsit mơ̆ng sang bruă kơnuk kơna pơkă kah dưi blơi pơmut. Gơnam ƀu hơmâo anăn, phun tơdŭ anih pơkra ming  gơmơi ăt ƀu blơi lơi, yua kơ mơnuih ƀôn sang pơ anai, gơñu blơi gơnam ĕp lăng tong ten, thâo rơgơi biă mă gơnam hiam klă hă ƀô̆, tơdah blơi ƀu hơmâo anănlăi rơđah anih pơkra ming, ƀu hơmâo gru kơnăl tong ten arăng ƀu blơi ôh”.

Amăng hrơi blan pơphun tal hyu ĕp lăng khut khăt mơ̆ng lơ 15/5 truh lơ 15/6, ling tơhan djop sang bruă kơnuk kơna tơring čar Gia Lai hơmâo ƀuh 90 wơ̆t sĭ mơdrô soh glăi, đŭ prăk hăng rơnoh duh glăi 1 klai 700 klăk prăk. Lăp đing nao biă mă ñu, kông an tơring čar  hơmâo ƀuh hăng hơmâo mă tơgŭ kơđi 2 mơta tơlơi soh glăi bruă sĭ mơdrô, pơkra ming tơpung kơphê ngă mă ča. Sa tơlơi pơdjơ̆ nao gah hơbâo pruai, kmơ̆k laih anun gơnam yua ngă hmua ăt hlăk sem lăng kơđi laih anun phat kơđi khut khăt djơ̆ tơlơi phiăn. Ơ Lê Hồng Hà, khua anom bruă wai lăng anih sĭ mơdrô tơring čar Dak Lak brơi thâo:

“Amăng boh yom phun tơlơi git gai mơ̆ng Khua dêh čar kơ bruă pơphun tal mă bruă tong ten pơdjơ̆ nao gơnam sĭ mơdrô, mơnuih ƀôn sang blơi yua anun lĕ, mơnong ƀong huă lăi hrŏm hăng gơnam blơi mơnong kah hăng ia jrao đĭ pran "sản phẩm chức năng" ia jrao ngă mă ča ƀu sit arăng sĭ mơdrô. Khul khua mua git gai hăng grup hyu mă bruă yom phara tơring čar Gia Lai pơtum nao kơ dua bruă anun. Hrŏm hăng anun, tơring čar ăt git gai brơi ĕp lăng bruă sĭ mơdrô ia săng, ia jâo, hơbâo pruai, kmơ̆k pơkra ming, gơnam ngă hmua kiăng pơhlôm hlâo hăng pơgang ba tơlơi tŭ yua kơ mơnuih ƀôn sang blơi laih anun anom bruă sĭ mơdrô amăng tơring čar".

Ƀu dŏ glăi dơ̆ anun ôh, gah anom bruă ia jrao tơring čar Gia Lai ăt mut hrŏm pơčrong sai brơi ĕp lăng tong ten, pơsir khut khăt tơlơi soh glăi. Gơnong bruă ia jrao tơring čar Gia Lai akŏ pơjing 2 grup hyu ĕp lăng phara gah bruă sĭ mơdrô ia jrao pơjrao tơlơi ruă, gơnam yua ngă hiam drơi jăn, ia klôñ ia phong kiăng pơgang anŏ klă hiam rơnuk rơnua. Giong pel ĕp ƀơi lu anih amăng plơi prong Plei Ku, tơring glông Đưk Kơ hăng plơi prong Ayun Pa, hơmâo ƀuh 5 boh anih ngă soh glăi. Tơlơi ngă soh juăt ñu ƀu răo pơthâo anăn gơnam sĭ mơdrô, djă pioh, răk lui ƀu djơ̆ anih, ƀu čih gru kơnăl anăn ia jrao hăng gơnam sĭ mơdrô. Yă Ksor Hiền, Kơ-iăng Khua Gơnong bruă ia jrao tơring čar Gia Lai brơi thâo:

“Hrơi blan pơ anăp Gơnong bruă ia jrao ăt tŏ tui hyu ĕp lăng kiăng pơhlôm pơgang klă anŏ tŭ yua sit nik mơ̆ng ia jrao gun, gơnam yua ia phong arăng sĭ mơdrô brơi mơnuih ƀôn sang amăng tơring čar blơi yua. Hăng bruă kiăng ngă khut khăt ƀu hơmâo anih kom, ƀu hơmâo pô bĕ ôh, sit ƀuh ngă soh pơsir truh kih, tui hluai hơnơ̆ng ngă soh kơtang ƀudah tơdu hai, akŏ pơjing grup hyu mă bruă, ĕp lăng, kông an amăng grup nao hrŏm ding kơna hyu ĕp lăng bruă mă, sit ƀuh hơmâo tơlơi soh glăi khom pơsir hĭ khut khăt hăng lăi pơthâo khua mua pơ dlông pioh pơsir hmao kru”.

Hơdôm tơlơi gir run mơ̆ng djop gưl anom bruă, sang bruă tơring čar Gia Lai hơmâo djru pơđĭ tui tơlơi thâo hluh mơ̆ng mơnuih ƀôn sang, anom bruă sĭ mơdrô amăng bruă ngă tui djơ̆ tơlơi phiăn kơnuk kơna laih dơ̆ng pơjing anih anom sĭ mơdrô tơpă, hơđong hăng rơđah rơđong hloh.