VOV4.Jarai-Rơgao mơkrah thun 2022 laih, rơnoh prăk mă yua tuh pơ alin kơ bruă čar ƀơi tơring čar Gia Lai phrâo ngă djop 23%, aset hloh rơnoh pơkă bơkơnar amăng dêh čar ta lĕ 27%. Amăng anun, lu kơčăo bruă phun yôm mơ̆ng tơring čar kaih ngă yua pơkra glăi rơnoh tuh pơ alin tơdơi kơ bơbeč djơ̆ mơ̆ng nua lŏn pơmă hăng rơnoh blơi gơnam yua man pơdong đĭ. Anom bruă kơnuk kơna amăng tơring čar pơsit khut khăt lăi pơthâo rơkâo Jơnum min mơnuih ƀôn sang tơring čar kơ bruă git gai mă yua prăk čan man pơdong phun, kiăng ngă djơ̆ tơhnal pơtrun.

Mơ̆ng rơnuč thun 2021, Khul wai lăng tuh pơ alin man pơdong tơring glông Čư̆ Pah, Gia Lai hơmâo ngă giong laih hră pơar tuh pơ alin čuk pơkra 4 arăt jơlan nao pơ djop să kual ataih pok pơhai mơ̆ng akŏ thun 2022. Samơ̆, lơ̆m truh hrơi tơgŭ mă bruă rơnoh gơnam yua mă bruă, pơkra ming đĭ pơmă đơi. Tui hăng anun, simăng, pơsơi, pơtâo, ia jâo diezel, kơsu ngă gŏ drong pơkra jơlan lêng kơ đĭ nua mơ̆ng 10-20%, ƀơi anŏ đĭ hloh dua wơ̆t mơkrah hăng rơnoh pơsit brơi ngă blung a. Tơlơi anai ngă kơ tơring čar khom pơdơi mơtam kơčăo bruă hlăk dŏ mă bruă yua tơguan djop sang bruă kơnuk kơna tơring čar pơčrâo brơi dơ̆ng. 

Ơi Đặng Thái Huy-Khua khul wai lăng hơdôm kơčăo bruă tuh pơ alin man pơdong bruă phun tơring glông Čư̆ Pah brơi thâo:

“Amăng abih tih rơnoh prăk 100 klai anun, rơgao rơnoh yap tuh pơ alin abih bang 10 klai. Lơ̆m anun, tơring glông ngă hră lăi pơthâo rơkâo Jơnum min mơnuih ƀôn sang tơring čar git gai. Ră anai, pơsit brơi čuk pơkra 4 arăt jơlan, tơring glông ruah mă 2 arăt jơlan čuk pơkra hlâo. Rơnuč črăn lĕ, rơnoh gơnam đĭ pơmă tui tơdah trun nua pơsit brơi mă bruă đôč. Tơdah ăt rơgao đơi rơnoh pơkă rơkâo tơring čar pơkă glăi dơ̆ng jơlan hơdră pơtrun”.

Kơčăo bruă čuk pơkra jơlan nao pơ să tơring glông Čư̆ Pah kaih yua nua gơnam man pơdong pơmă đơi

Hrom hăng rơnoh gơnam đĭ yôm pơmă, lŏn tơnah nua ăt đĭ yôm mơ̆n ngă tơnap kơ bruă pơklaih ala lŏn duh glăi lŏn sang đang hmua mơnuih ƀôn sang tơnap, lu kơčăo bruă prong ƀơi Gia Lai sit mơ̆n kaih mă bruă ngă giong. Khul wai lăng črăn anet amăng kơčăo bruă čuk pơkra jơlan pơtruh nao pơ djop tơring glông Čư̆ Sê, Čư̆ Pưh, Čư̆ Prong ataih 33 km, rơnoh prăk tuh pơ alin 320 klai prăk. Kơčăo bruă tuh pơ alin mơ̆ng blan 3/2021, truh ră anai, atur jơlan, čuk pơkra, tuh pơtâo čuah giong yơh. Kơnong črăn găn nao pơ hơdôm anih plơi pla mơnuih oôn sang dŏ ƀơi tơring kual Nhơn Hòa, tơring glông Čư̆ Pưh, dŏ gun hĭ pơklaih ala lŏn yua mơnuih ƀôn sang aka ƀu tŭ ư ôh. Ơi Phạm Xuân Điệp Khua Khul wai lăng kơčăo bruă tuh pơ alin man pơdong tơring čar Gia Lai anom bruă tuh pơ alin brơi thâo:

“Ră anai, dŏ rơbêh 2km aka ƀu hơmâo hơdră pơsir duh glăi pioh čuk pơkra jơlan ƀơi tơring glông. Jơnum min mơnuih ƀôn sang tơring čar hăng djop anom pơdjơ̆ nao git gai pơtrut tañ bruă pơklaih ala lŏn jing duh glăi kơ mơnuih ƀôn sang pô lŏn djơ̆ jơlan čuk nao. Ƀing gơmơi him lăng blan 9 dơlit atur hăng tuh pơtâo, anih pơkra tơdrông tua găn hnoh ia ngă giong laih. Pơđut bơyan hơjan, djop anom bruă pơtum nao kơ bruă tuh kơsu gŏ drong".

Tui hăng Gơnong bruă Man pơphô hăng Tuh pơ alin tơring čar Gia Lai, thun 2022 lĕ thun pok pơhai lu kơčăo bruă phrâo mơ̆ng črăn tuh pơ alin ƀiă thun mơ̆ng thun 2021-2025. Hăng lu kơčăo bruă man pơdong phrâo, rơngiă lu mông pok pơhai ngă hră pơar ĕp lăng, rek ling pơkă hnong, pơsit brơi ngă bruă, juă nua tuh pơ alin…, khom truh rơnuč thun kah mơ̆ng dưi ngă, anun yơh hơdôm blan akŏ thun tuh pơ ain rơnoh prăk ƀiă. Nua gơnam man pơdong, ming pơkra yôm pơmă ngă tơnap kơ bruă tuh pơ alin, biă mă ñu hơdôm kơčăo bruă hơmâo kĭ pơkôl tui hră sĭ mơdrô man pơdong mơ̆ng thun 2020, 2021.

Kơčăo bruă pơkra jơlan pơtruh nao rai hơdôm tơring glông

 Čư̆ Pưh-Čư̆ Pưh-Čư̆ Prong

Tum teč biă ñu, thun 2022, tơring čar Gia Lai hơmâo abih bang 27 ring bruă tuh pơ alin kơ bruă čar, rơnoh prăk jŭ yap blung a truh kơ 3.600 klai prăk. Yap truh lơ 19/7/2022, tơring čar kiah tuh pơ plai 993 klai prăk, dưm dưm hăng 22,8%, ƀiă hloh hnong pơkă amăng dêh čar lĕ 27%. Ơi Nguyễn Hữu Quế Khua Gơnong bruă Man pơphô hăng Tuh pơ alin tơring čar Gia Lai brơi thâo, ră anai, hơmâo kơčăo bruă phun gun hĭ bruă pơklaih ala lŏn čuk jơlan, 11 kơčăo bruă aka ƀu ngă giong hră pơar tuh pơ alin, pô tuh pơ alin mă bruă tơguan, rơkâo čih pơkra pơkă glăi rơnoh prăk.

Tơring čar akŏ pơjing 4 grup mă bruă hyu sem lăng na nao, pơtrut lu tơring glông, anom bruă, rơkâo đĭ hơdră pơsir brơi djơ̆ lăp, hmao kru pơsir hĭ hơdôm tơlơi dŏ gun amăng bruă tuh pơ alin. Tui hăng ơi Nguyễn Hữu Quế, ră anai hơdôm tơlơi dŏ gun hơmâo pơsir tui ƀơ ƀrư̆ laih:

“Hơdôm tơlơi hơmâo bơbeč djơ̆ kơ bruă mă amăng thun 2022, sit mơ̆n ăt dŏ hơmâo đôč kah hăng rơnoh gơnam ming pơkra man pơdong; nua lŏn tơnah huăi đĭ đơi dơ̆ng tah; hơmâo hơdôm ring bruă dŏ gun hăng tơlơi phiăn pơkă lĕ lu sang bruă hơmâo tơlơi dưi pơsir brơi. Tui anun, mơ̆ng ră anai truh abih thun, bruă pok pơhai tuh pơ alin man pơdong phun hăng wai lăng kơčăo bruă tong ten, brơi tuh pơ alin čan prăk. Gơmơi lăi pơthâo hăng khua jơnum min mơnuih ƀôn sang tơring čar bruă duh glăi lơ̆m man pơdong bruă phun amăng tơring čar kiăng ngă djơ̆ hnong pơkă, djơ̆ tơlơi pơtrun”.

Ăt tui hăng Gơnong bruă Man pơphô hăng tuh pơ alin tơring čar Gia Lai, tơring čar anai dŏ lu kơčăo bruă yôm kah hăng: Kơčăo bruă pơkra jơlan ƀơi guai dêh čar kiăng ječ biă ƀơi tơring glông Đưk Kơ, pơphun čuk pơkra mơ̆ng blan 12/2020, him lăng ngă giong blan 11/2022; Kơčăo bruă jơlan pơtruh nao rai hơdôm tơring glông Čư̆ Sê-Čư̆ Pưh-Čư̆ Prong pơphun čuk pơkra blan 3/2021, him lăng ngă giong blan 12/2022; Kơčăo bruă pơkra glăi jơlan tơring čar mrô 663 pơphun pơkra blan 12/2021, him lăng giong amăng blan 11/2023; kơčăo bruă pơkra glăi jơlan mrô 664 pơphun ngă blan 12/2021, him lăng ngă giong blan 11/2023.

Nay Jek: Pơblang