VOV4.Jarai-Tlam lơ 30/8, kông an tơring čar Gia Lai jơnum lăi pơthâo hră pơsit bruă mơ̆ng Ding jum kông an pơđĭ bruă kơ Trung tá Ksor H’Bơkhăp, ngă Kơ-iăng khua anom bruă kông an tơring čar Gia Lai. Yă Ksor H’Bơkhăp lĕ đah kơmơi Jrai blung a ngă Kơ-iăng Khua anom bruă kông an tơring čar Gia Lai. Ƀơi mông jơnum, Thiếu tướng Rahlan Lâm, Khua kông an tơring čar Gia Lai brơi thâo, Trung tá Ksor H’Bơkhăp thun tơkeng 1982, plơi pla phun să Ia Trok, tơring glông Ia Pa, Gia Lai, hrăm giong Thạc sĩ gah tơlơi phiăn ĕp tơlơi soh sat.

Trung tá Ksor H’Bơkhăp tŭ mă hră pơsit mơ̆ng Ding jum kông an

Trung tá Ksor H’Bơkhăp ngă bruă 16 thun rơgao, hăng apăn lu bruă ngă khua pơ plơi prong Ayun Pa gah bruă kông an: Ngă Kơ-iăng khua grup, Kơ-iăng khua, Khua anom bruă kông an Ayun Pa, ñu ngă khua git gai rơgơi kơhnâo biă mă amăng bruă mă. Trung tá Ksor H’Bơkhăp lĕ đah kơmơi ngă Kơ-iăng Khua kông an tơring čar blung a ƀơi Gia Lai. Ngă bruă phrâo anai ñu lăi, ăt khom hrăm lu, gir run ƀư̆ pơkra pran jua klă hloh kiăng dưi ngă bruă lăp hăng sa čô kông an mơnuih ƀôn sang, ƀu pơdơi ôh hrăm, kiăng thâo laih anun ngă giong bruă jao.

Nay Jek: Pơblang