Amăng anun, hơmâo bruă mă pơsir prăk ba yua tuh pơ alin kơ bruă čar. Tui hăng tơlơi lăi pơthâo ƀơi mông jơnum, rơnoh pơđĭ kyar bơwih ƀong huă ƀơi Gia Lai 6 blan akŏ thun dưi ngă djop 5,54% pơkă hăng tal anai mơ̆n thun hlâo. Hơdôm tơhnal pơtrun kơ pơhrui prăk duh jia, pơkra ming hăng măi mok, mrô sang bruă sĭ mơdrô čih anăn mă bruă glăi hăng mrô kơčăo bruă tuh pơ alin lêng kơ đĭ soh; bruă mă tuai čuă ngui pơblih klă hiam. Mah tui anun, lu tơring glông ƀơi Gia Lai ăt bưp tơlơi tơnap tap amăng bruă pơhrui prăk yua lŏn anun ngă kơƀah prăk tuh pơ alin, kaih ngă hră pơtrun yua lŏn; rơnoh pok pơhai djop hơdră tơhnal dêh čar pơkă kaih.

Kơnong amăng bruă tuh pơ alin kơ bruă čar 6 blan rơgao, tơring čar kiah ba yua 14%. Anai lĕ gah bruă mơ̆ Jơnum min mơnuih ƀôn sang tơring čar Gia Lai hăng djop gơnong bruă pơtum nao pơsir pơ anăp anai. Jơnum min mơnuih ƀôn sang Gia Lai ăt akŏ pơjing 3 grup pioh kơtưn hyu sem lăng, pơsir hơdôm tơlơi hơmâo dơ̆ng.