Hơdôm hrơi hăng anai, mơnuih mă bruă  ngă kông ñơn man pơkra jơlan pơtruh nao rai tơring glông Mang Yang hăng Ia Pa, hlăk dŏ mă bruă dik dăk samơ̆ ƀơi črăn jơlan ataih 33 km, rơnoh prăk tuh pơ alin truh 193 klai, samơ̆ ăt mă bruă kaih aka ƀu giong ôh. Pơphun mă bruă mơ̆ng blan 11/2023 hăng him lăng giong amăng blan 1/2026, samơ̆ anih dŏ đôm hĭ djơ̆ lŏn duh glăi, juăt lăi bruă pơklaih ala lŏn či jao glăi pioh čuk pơkra jơlan aka ƀu dưi giong ôh. Ơi Krung Dam Đoàn, Kơ-iăng Khua Jơnum min mơnuih ƀôn sang tơring glông Mang Yang brơi thâo, lu anih kiăng čuk pơdăo, jao glăi bruă pơkra jơlan samơ̆ aka ƀu thâo rơnoh duh glăi rơđah rơđong ôh kơ pô lŏn sang đang hmua mơnuih ƀôn sang:

“Bruă pơklaih ala lŏn duh glăi kơ pô lŏn đang pơdjơ̆ nao 33 boh sang anŏ mơnuih ƀôn sang, găn nao ƀơi 3 boh să: Kon Thụp, Đak Djrăng hăng Lơpang tơring glông Mang Yang. Ră anai dŏ hơdôm anih kiăng pơkă rơnoh yua lŏn duh glăi kơ mơnuih ƀôn sang, tơring glông khom ngă hrŏm sang bruă tuh pơ alin čuk jơlan ngă hră pơar tañ pơkă nua djơ̆ lăp, pơhaih rơđah hăng ană plơi pla, kiăng ngă djơ̆ rơnoh pơkă tui tơlơi phiăn”.

Gah ƀing mă bruă čuk jơlan lĕ, ơi Nguyễn Hữu Sơn, pô wai lăng kơčăo bruă mrô 01, Khul wai lăng kơčăo bruă tuh pơ alin man pơdong ƀơi tơring čar Gia Lai brơi thâo, truh ră anai, bruă hơmâo ngă ƀơi kơčăo bruă anai giong 61% akŏ bruă jao. Anom bruă anai, amra pơsir tañ hơdôm anŏ gun hăng pran jua khut khăt kiăng giong hlâo kơ lơ 30/8 thun anai.

“Bruă mă hơdai gum hrŏm lĕ ƀing gơmơi brơi mơnuih pơ ala nao pơ khul wai lăng bruă duh glăi kơ ană plơi hăng Jơnum min mơnuih ƀôn sang tơring glông Mang Yang pioh sem lăng gun či hơƀơi pơsir tañ. Anom bruă ăt git gai khut khăt ƀing mă bruă pơtum ba nao rơdêh čuk, gơnam yua mă bruă, mơnuih mơnam hăng pơtâo, čuah simăng pơtrut tañ pơkra jơlan kiăng hmao hrơi blan pơkă”.

Kơčăo bruă wai lăng anih mơnuih ƀôn sang dŏ ter jơlan Nguyễn Văn Linh, plơi prong Plei Ku ăt hlăk ngă kaih yua aka pơsir duh glăi kông ngăn arăng. Kơčăo bruă rơnoh prăk tuh pơ alin 260 klai, mă yua prăk kơnuk kơna dêh čar hăng tui hăng hrơi blan pơčah ngă giong thun 2022 truh thun 2025. Samơ̆, truh ră anai bruă hơmâo ngă man hơmâo 60%. Amăng abih bang đơ đam lŏn mă glăi truh kơ 40 ha, kơnong năng ai 24 ha đôč tŭ ư hăng hơdră duh glăi...

Mơ̆ng bruă ngă ƀuh sit nik anai, Jơnum min mơnuih ƀôn sang tơring čar Gia Lai hơmâo ngă hră pơtrun hiăp git gai djop sang bruă ngă hrŏm sem glăi, pơsir tañ tơlơi gun hăng pơtrut hmar ƀiă bruă mă čuk pơkra jơlan. Ơi Nguyễn Hữu Quế, Kơ-iăng khua Jơnum min mơnuih ƀôn sang tơring čar Gia Lai hrŏm hăng djop gơnong bruă tơring čar, djop tơring glông nao ĕp lăng truh pơ anih dŏ gun hăng git gai tañ pơsir hĭ tañ jao glăi kơ ring bruă čuk pơkra; pơtrut hmar bruă pơklaih ala hăng pơsir hĭ bruă čuk pơkra jơlan kiăng tañ ngă giong tui hăng bruă jao.

“Bruă gơgrong ba pơtô lăi duh glăi lŏn mơnuih ƀôn sang lĕ sa bruă mă ječ mơ̆ng gong gai kơnuk kơna. Nao bưp rim sang anŏ mơnuih hơmâo kông ngăn pơdjơ̆ nao, pơblang rơđah tong ten, hơmâo pô khom ngă khut khăt, sit kơđông lĕ lăi pơthâo hăng jơnum min mơnuih ƀôn sang tơring čar rơkâo ĕp hơdră či ngă tui laih anun ăt lăi pơhâo tong ten tơlơi pơmin mơ̆ng ta pô, pơblang brơi thâo, ngă tui anun pơgang ba boh tŭ yua kơ kơnuk kơna, kơ mơnuih ƀôn sang, rơkâo khua mua tơring čar pô pơsit. Kiăng pơdah thâo rơđah pô glăm ba, hrơi blan pơkă kơ bruă mă kah hăng pơtong rơđah ngă hiư̆m pă tañ giong črăn anai, pok dơ̆ng črăn tŏ tui”.

Bruă Jơnum min mơnuih ƀôn sang tơring čar Gia Lai tañ pok pơhai lu hơdră kiăng pơhlôm ba tŭ yua amăng djop jơlan hơdră, akŏ bruă tuh pơ alin kah hăng bruă ngă ječ ameč soh, yua amăng hrơi blan dăp glăi, ruah mơnuih mă bruă gong gai kơnuk kơna amăng tơring čar plơi pla tañ sir. Bruă mă tơring čar Gia Lai brơi jŭ yap glăi kah hăng akŏ bruă tuh pơ alin mơ̆ng thun 2021-2025, akŏ bruă thun 2025 ăt kah hăng akŏ bruă tŏ tui dơ̆ng. Laih dơ̆ng, jơnum min mơnuih ƀôn sang pơtrun hiăp djop anom bruă khom pơtum pran jua pơsir hĭ hơdôm anih anom aka ƀu tla prăk, anom bruă ƀơi tơring čar hăng djop tơring glông, plơi prong khom pơčrâo rơđah bruă mă, glăm ba, rơkâo pơsir djơ̆ găl tŭ yua hloh, pơkrem prăk kăk tuh pơplai, kiăng huăi huač soh sel prăk kăk kông ngăn.