Lơ 5/8, Jơnum min mơnuih ƀôn sang tơring čar Gia Lai hơmâo hră lăi pơthâo Khul git gai djop ring bruă phun ƀơi dêh čar mơ̆ng tơring čar, lăi pơthâo tơlơi pơhing prăp lui pok pơhai akŏ bruă tuh pơ alin čuk jơlan rơdêh đuăi hmar Quy Nhơn-Plei Ku.

Tui hăng anun, tơring čar Gia Lai prăp lui yơh pơphun tơgŭ ngă bruă, čuk pơkra jơlan rơdêh đuăi hmar amăng blan 10 thun anai. Hăng akŏ bruă jơlan rơdêh đuăi hmar Quy Nhơn-Plei Ku, tơring čar git gai djop sang bruă ĕp lăng anih čuk pơkra, lŏn mơnai glai klô, čih pioh, jŭ yap glăi, pơkă hơnơ̆ng; rơkâo đĭ ƀư̆ pơkra anăp čuk jơlan či nao ƀơi čư̆ jơlan čun čue An Khê kiăng pơhrŏ hĭ ƀiă trun čư̆ đung đuai, pơhrŏ ƀiă hrơi blan čuk pơkra jơlan hăng prăk kăk tuh pơ alin. Kơčăo bruă čuk jơlan rơdêh đuăi hmar Quy Nhơn-Plei Ku rơnoh glông ataih 125 km, găn nao ƀơi tơring čar Gia Lai, jơlan anai prong pang djop 4 boh rơdêh nao sa amăng plĕ, dưi đuăi hmar lơ̆m sa mông 100 km; djop črăn bruă jơlan mur gah yŭ čư̆, ngă tơdrông tua găn čroh hnoh, ia krông, anih jơlan tơkuh, anih dưm truă ia rơgơi ƀơi jơlan čơlah hăng anih jưh rơdêh tui anŏ phrâo ia rơgơi soh. Rơnoh prăk tuh pơ alin abih tih 43.734 klai prăk, amăng anun tơring čar Gia Lai hơmâo 1.250 klai prăk laih anun rơkâo pơčruh hrŏm lu rơnoh prăk pơkŏn, prăk duh glăi lŏn sang đang hmua djơ̆ jơlan arăng čuk nao.