VOV4.Jarai - Truh ră anai, gơnong bruă ia jrao amăng tơring čar Gia Lai hơmâo prap lui laih djop mơta kiăng kơ tlâ̆o vaccine Covid-19 brơi ƀing čơđai mơng 5 truh pơ pơ gŭ 12 thun. Ơi Nguyễn Đình Tuấn- Kơ-iăng Khua gơnong bruă ia jrao tơring čar Gia Lai brơi thâo; ră anai, tơring čar Gia Lai hơmâo rơbêh 212.000 čô čơđai mơng 5 truh pơ gŭ 12 thun. Kiăng kơ prap lui djop mơta hlâo kơ tlâ̆o vaccine Covid-19 brơi ƀing čơđai amăng thun anai, amăng hrơi blan laih rơgao, gơnong bruă ia jrao tơring čar Gia Lai hơmâo jao Anom bruă wai pơgang klin kman pok pơhai bruă pơtô pơhrăm brơi ƀing nai ia jrao ƀơi ƀon lan bruă khăm hlâo, tlâ̆o ia jrao hăng prap lui hŭi hơmâo tơlơi truh sat tơdơi kơ tlâ̆o ia jrao; pơtô hrăm brơi ƀing mơnuih djru bruă, ƀing čih hră pơ-ar, pơhlôm brơi hơđong ƀơi hơdôm anih tlâ̆o ia jrao. Him lăng, bruă tlâ̆o ia jrao amra pơphun ƀơi hơdôm sang hră hăng hơdôm anih anom ia jrao amăng plơi pla tơdơi kơ Ding jum ia jrao kah pha vaccine; ƀing čơđai mơng 5 truh pơ gŭ 12 thun amra tlâ̆o vaccine lơ̆m hơmâo tơlơi tŭ ư mơng amĭ ama, ƀudah ƀing mơnuih čem rông ba.

Siu Đoan: Pơblang