VOV4.Jarai-Mơguah lơ 9/2, Khul git gai pơgang rơnuk rơnua jơlan glông Gia Lai hăng lu tơhan djop sang bruă nao ĕp lăng pơsir tơlơi truh rơdêh đŭp kơtang biă mă ngă kơ 6 čô mơnuih djai hăng 3 čô mơnuih rơka. Mơguah sing bring lơ 9/2, rơdêh pơgiăng gơnam BKS mrô 81C-111.25 pơgiăng hơbơi ƀlang yua kơ Huỳnh Đức Nguyên thun tơkeng 1983, dŏ pơ phường Chi Lăng, plơi prong Pleiku, tơring čar Gia Lai mơgăt, rơdêh ñu rai mơ̆ng să Hà Đông tơbiă nao pơ să Đak Sơmei tơring glông Đak Đoa.

Lơ̆m hlăk đĭ rơdêh, tŭ tơ anŏ rơdêh ñu tơbleñ añreng trun amăng kriăng dơlăm 70 met. Tơlơi truh anai, rơdêh đŭp ngă 6 čô mơnuih djai. Laih hmư̆ tơlơi pơhing lăi pơthâo, lu tơhan djop sang bruă kơnuk kơna Gia Lai tañ nao truh pơ anih hơmâo tơlơi truh, djru brơi mơnuih ruă ba nao pơ sang ia jrao pơjrao laih anun ĕp lăng yua hơgĕt hơmâo tơlơi truh rơdêh anai lĕ trun amăng kriăng.

Nay Jek: Pơblang