Hơjan prong amăng hơdôm hrơi akŏ blan 9 anai, ngă ia ling dăo kơtang lu plơi pla, răm ƀăm 240 ha hmua pơdai, đang phun pla mơ̆ng 600 boh sang anŏ, hrŏm hăng jơlan glông nao rai, aking hmua, ia pơđoh răm tui, lŏn tơhroh hĭ.

Khua git gai ping gah să, ơi Phạm Văn Phương, brơi thâo, bruă pơđuăi sang anŏ mơnuih ƀôn sang lĕ hơdră pơsir brơi klă hloh kiăng hơđong brơi kual anai. Să ăt pơkă hơnơ̆ng abih bang či pơdong plơi, ruah mă anih či pơdong plơi phrâo giăm jơlan prong 25 hăng giăm sang să, anŏ prong rơhaih či brơi kơ sa boh sang anŏ pơdong đang sang lĕ, 580 met karê, djop lŏn pơdong sang, hơmâo wơ̆t đang phun pla hăng čem rông hlô mơnong. Tơdah hơmâo prăk tơring čar djru, kơčăo bruă anai hlong pok pơhai ngă tui mơtam, djru mơnuih ƀôn sang hơmâo anih dŏ hơđong sui thun, huăi bơngơ̆t kơ bơyan hlim ia ling dăo.