Tơdơi hơdôm wơ̆t hơjan prong, ia gah yŭ tơdrông tua pơ plơi Thanh Sơn, să Čư̆ A Thai rô tơtăng biă mă. Ayong Vi Văn Trượt, Khua ping gah ngă rah khua plơi ječ ameč nao pơ tơdrông či phin rup, giong anun pơdah đĭ amăng grup Zalo, pơtă kơ neh met wa kơđiăng lơ̆m nao rai. Tơkeng thun 1985, hrăm bruă tơlơi phiăn arăng pia cử nhân luật, hlâo kơ anun ñu mă bruă pơ sang să, tơdơi kơ pơmut glăi sang să, ayong Trượt glăi mă bruă pơ plơi Thanh Sơn hơmâo pơmut hrŏm mơ̆ng 3 boh plơi hơđăp, hăng 401 boh sang anŏ, 1.760 čô mơnuih, lu biă mă ñu lĕ mơnuih djuai ania ƀiă.

Anih wai lăng prong, ană mơnuih lu mơn, anun yơh ngă kơ khua plơi anai ĕp hơdră ngă bruă tañ hloh samơ̆ khŏm jê̆ giăm, krăp lăng mơnuih ƀôn sang tong ten. Tơdơi kơ rơbêh 2 blan mă bruă phrâo, ayong Trượt pơjing grup Zalo hơmâo 200 boh sang anŏ, hơmâo grup hơjăn mơ̆ng anom bruă kơđi čar, wơt hăng Fanpage Facebool, lua pôr pơhing đah mơ̆ng pôr pơhing. Ñu pơtô ba mơnuih mă yua VNeID, pơmut nao hră pơhlom nua mơnuih mơnam, hră pơhlom nua ia jrao laih anun mă yua glông ngă hră mơ̆ng ataih. Khă hnun, lơ̆m hơmâo bruă hơget thơ, ñu ăt nao pơ rim boh sang anŏ: “Ră anai, bruă mă amăng plơi lu biă, khŏm nao pơtô lăi tơl sang, đah mơ̆ng thâo rơđah anŏ tơnap mơ̆ng neh met wa hiưm pă, hnun kah mơ̆ng dưi ngă giong bruă; giong anun lăi pơthâo glăi anŏ tơnap hăng ƀing khua, ƀudah tŭ mă hră pơtrun khŏm pok măi computer soh. Ră anai, kâo glăk ngă lăng hlâo či pơtô brơi neh met wa pơmut djŏp hră pơ-ar amăng VNeID”.

Tơdơi kơ pơmut hrŏm, plơi D’Rốc, să Čư̆ A Thai, hơmâo rơbêh 500 boh sang anŏ, hăng 8 phung djuai hơdip hrŏm. Ơi Nguyễn Công Quân, mơnuih hơmâo lu thun laih ngă khua plơi hăng Khua khul tơhan hơđăp, hơmâo ană plơi ruah ngă khua plơi phrâo. Thâo djŏp glông jơlan, anih pơpă thơ amuñ hơmâo lŏn tơhlŏm, kriăng tơdlưh, hăng hơdôm črăn jơlan ia dăo lơ̆m hơjan prong, ñu nao sem lăng, pơtă hlâo kiăng mơnuih ƀôn sang bĕ hĭ: “Pơhmutu kah hăng Anom bruă bơwih ƀong mơit hră lăi pơthâo ayuh hyiăng, jing ta nao lăi pơhmư̆ tơl plơi pla mơtăm, čih pioh amăng plang mơnuih mơnam juăt yua kiăng neh met wa ñu thâo. Amăng bruă ngă hmua hai ăt klă hloh mơn lơ̆m ta thâo rơđah djŏp tơlơi pơhing. Tơdah pơmin či rah pơtĕm, sai  pơdai lĕ arăng rah pơtĕm, sai hlao mơtăm kiăng tañ čăt, ƀudah kơdun glăi dong”.

Mơ̆ng 23 boh plơi hơđăp, să Čư̆ A Thai dăp glăi dŏ 13 boh plơi, hơmâo 8 čô khua plơi laih anun 5 čô khua ping gah ngă rah khua plơi. Abih bang khua plơi ngă bruă ƀơi plơi phrâo leng kơ hrăm abih anih 12 ƀudah hrăm prong hloh, dưi yua măi computer, măi phôn rơgơi. Tơdơi kơ ruah giong mơnuih mă bruă, să pơtô brơi bruă pôr pơhing, phat kơđi amăng plơi pla, sem lăng glăi sang anŏ ƀun rin, wai lăng plơi pla rơnuk rơnua; laih dong ngă kjăp bruă plah wah khua plơi hăng grup ping gah, khul khua jơnum min djŏp djuai ania mơnuih mơnam, kông an să hăng djŏp khul grup. Ơi Nguyễn Hữu Khoá, Kơ-iăng khua ping gah, Kơ-iăng khua jơnum min mơnuih ƀôn sang să Čư̆ A Thai brơi thâo, khul mă bruă anai ăt djru brơi mơnuih ƀôn sang juăt hăng bruă ngă pơ-ar, pơsir bruă amăng plang boh thâo mrô: “Ƀing khua plơi tơdơi kơ pơmut glăi gong gai plơi pla jing mă bruă beč bal biă, mă yua măi telephôn rơgơi hăng grup Zalo, hơdôm plang mơnuih mơnam juăt mă yua đah mơ̆ng thâo djŏp bruă kiăng ngă. Ƀing khua plơi ăt ngă hrŏm klă hăng grup boh thâo mrô, djru ba mơnuih ƀôn sang dưm pơmut hră pơ-ar amăng VNeID, glông ngă hră online, tla prăk online, mut ĕp phun atur ia rơgơi či hrăm bruă”.

Ƀơi tơring čar Gia Lai, mrô plơi pla, ƀôn ƀut hrŏ trun rơbêh kơ 48% laih tơdơi kơ pơmut glăi. Ră anai tơring čar hơmâo 1.400 čô khua plơi, khua ƀôn ƀut. Amăng anun 183 čô mơnuh ngă rah khua ping gah plơi. Lăp đing nao, hơmâo 10 čô hrăm gưl prong, hơmâo 1 čô nai prin tha hăng 9 čô hrăm gưl prong pơkŏn dong. Ơi Nguyễn Thanh Vũ, Kơ-iăng khua gơnong bruă čar tơring čar brơi thâo, tơring čar glăk gir pơđĭ tui tơlơi rơgơi, tơlơi kơdrưh, kơnuih ngă bruă hăng tơlơi rơgơi mă yua boh thâo mrô mơ̆ng ƀing khua plơi, khua ƀôn but đah mơ̆ng hơmâo khul khua plơi, ƀôn ƀut dưi mă bruă amăng rơnuk anai: “Tơdơi kơ dăp glăi, jai hrơi khul ngă bruă anai amra hơmâo pơđĭ tui tơlơi rơgơi, kjăp bruă hloh. Kiăo tui tơlơi kiăng mơ̆ng Khul pơphun bruă ping gah hăng mơ̆ng tơring čar, jing bruă mă yua ia rơgơi tơlơi pơhing mơ̆ng ƀing gơñu khŏm tañ. Ră anai anom bruă điện tử mơ̆ng tơring čar pơtruh hăng plơi pla, khŏm thâo yua boh thâo phrâo kah mơ̆ng dưi mut ĕp amăng plang phần mềm anai. Yua hnun, khŏm kiăng gơñu thâo hluh kơ boh thâo mrô”.

Tơdơi kơ pơmut hrŏm, plơi pla jing prong hloh mơn, anun ƀing khua plơi khŏm glăm bruă kơtang hloh mơn. Lơ̆m hơmâo pơđĭ tui tơlơi rơgơi, kjăp bruă hăng pơplih hơdră ngă bruă, gơñu yơh pô pơtruh brơi gong gai hăng mơnuih ƀôn sang./.