VOV4.Jarai - Tơdơi kơ 3 hrơi bơbeč mơng kơthel tal 2 ngă hơjan prong na nao, amăng đơ đam tơring čar, hơdôm rơtuh bôh sang mơnuih ƀôn sang hăng hơdôm rơbâo ektar hmua pơdai hăng đang phun pla pơkon mơng mơnuih ƀôn sang ƀơi hơdôm anih anom amăng tơring čar Gialai răm rai yua kơ ia ling dăo. Tui hăng mrô yap mơng Grŭp črâo ba bruă pơgang pơgăn ayuh hyiăng ƀu klă ngă hăng hyu ĕp mơnuih hmâo tơlơi truh tơring čar Gialai, mơng lơ 7/8 truh mơguah kơ 10/8, să Ia Piar, tơring glông Čư̆ Prông hmâo 125 bôh sang mơnuih ƀôn sang ia ling lip.

Sa blah hmua pơdai ƀơi tơring glông Phú Thiện ia ling dăo lu hrơi hăng anai

Ƀơi anai, ăt hmâo lu mơn jơlan nao rai ia ling lip, ngă guang dar, gong gai khom ba đuăi 24 bôh sang anô̆. Hrom hăng anun, 1500 ektar hmua pơdai hăng đang phun pla pơkon mơng mơnuih ƀôn sang ăt ia lip mơn. Amăng anun, hơdôm anih anom hmâo lŏn ngă đang hmua răm rai lu lĕ Phú Thiện hăng 447 ektar hăng tơring glông Čư̆ Prong 368 ektar; hơdôm bôh tơring glông pơkon kah hăng tơring glông Ia Pa, Čư̆ Pưh hăng plơi prong Ayun Pa ăt hmâo mơn hơdôm rơtuh ektar hmua pơdai hăng đang phun pla pơkon bơbeč djơ̆. Ră anai, Grŭp  črâo ba bruă pơgang pơgăn ayuh hyiăng ƀu klă ngă hăng hyu ĕp mơnuih hmâo tơlơi truh tơring čar Gialai hăng hơdôm bôh tơring glông, plơi prong lăi pơhing na nao, črâo ba hơdôm khul pơphun agaih rơmet anih anom dô̆ ƀơi hơdôm ia ling dăo, tơdơi kơ ia thu./.

Siu H’ Prăk: Pơblang