VOV4.Jarai - Lơ 17/5, Keh prăk pơgang pơgăn rơka ruă kual ASIA (AIP) gum hrom hăng Grŭp pơhlôm ƀơi jơlan nao rai tơring čar Gialai pơphun Jơlan hơdră pơsit bôh tơhnal tal 2 mơng rơwang bruă “Hrŏ trun rơnoh đuăi – Sang hră pơhlôm klă” ƀơi plơi prong Pleiku. Rơwang bruă dưi pok pơhai ƀơi plơi prong Pleiku (Gialai) mơng blan 7/2020 truh ră anai.

Bah amăng war Sang hră gưl sa Chu Văn An (plơi prong Pleiku)

Tui tơlơi pơsit mơng ơi Lê Văn Hạnh – Kơ-iăng Khua gơgrong gah Gơnong bruă jơlan nao rai dŭ pơgiăng, Kơ-iăng Khua Grŭp pơhlôm ƀơi jơlan nao rai tơring čar Gialai, hơdôm bôh sang hră gưl sa ƀơi plơi prong Pleiku hmâo pơhlôm klă hơdôm tơhnal pơkă kơ hơdră kual sang hră pơhlôm. Kiăo tui anun, ƀơi kual bah amăng war 29 bôh sang hră gưl sa ƀơi plơi prong, anom pok pơhai rơwang bruă hmâo pơplih, pơhư prong laih, pơdŏng phrâo rơbêh kơ 800.000 met kơ rê jơlan ƀê tông tuh kơ su, bê tông xi măng; pơkra rơbêh kơ 2000 met kơ rê plăng jơlan; dưm hlă 136 bôh hnal lăi pơthâo jơlan nao rai ƀơi kual bah amăng war sang hră; pơhrua nao dong glông rek, ƀut tơglưh rơnoh đuăi hmar... Hrom hrom hăng anun lĕ bruă lăi pơhing kơ djop mơnuih thâo hăng gum hrom hăng khul tơhan polih wai lăng ƀơi jơlan nao rai plơi prong Pleiku hyu tir, pel ĕp, phak tơhmal hơdôm mơnuih ngă soh tui tơlơi pơkă phrâo kơ rơnoh đuăi ƀơi kual sang hră./.

Siu H’ Prăk: Pơblang