VOV4.Jarai - Anăp nao Blan hlăk ai, Hlăk ai tơring čar Gialai glăk hmâo lu bruă mă sit nik, pơdah pran jua ba jơlan hlâo, gum djru, pơčeh phrâo. Blan hlăk ai thun 2022, Khul hlăk ai tơring čar Gialai ngă lu bruă prong, amăng anun ƀuh rơđah hloh lĕ jơlan hơdră “Blan hlăk ai” thun 2022 hăng bruă bơkơtưn čơkă mơ-ak Jơnum Khul hlăk ai rơnuk Hồ Chí Minh hơdôm gưl, rơwang bruă 2022-2027 dưi pơphun ƀơi Sang hră gưl sa Lê Hồng Phong, să Ia Trôk, tơring glông Ia Pa (Gialai).

Khul hlăk ai tơring čar Gialai ƀơk gơnam tam brơi kơ ƀing čơđai sang hră gưl sa Lê Hồng Phong să Ia Trôk, tơring glông Ia Pa (Gialai)

Amăng rơwang jơlan hơdră anom bruă hmâo ƀơk brơi 135 anung gơnam kơ ƀing čơđai sang hră; Ƀơk 1 hơdră “Anih anom pơđok hră, gum lăi pơthâo nao rai hăng jơnum grŭp” hmâo nua 50 klăk prăk; ƀơk 2 bôh sang “Khăn quàng đỏ” kơ čơđai muai tơnap tap. Rơngiao kơ anun, anom ăt hmâo pơphun mơn hơdôm jơlan hơdră ngă yua kơ plơi pla kah hăng: Djru brơi rơbêh kơ 400 anung drah gum djru, djru hrơi bruă, pơplih pơkra jơlan nao rai amăng plơi pla, pơdŏng brơi sang dô̆ hơdor tơngia, hơdôm bruă mă djru gum amăng bruă pơgang, pơgăn klin Covid-19...

Siu H’ Prăk: Pơblang