VOV4.Jarai - Hơdôm hrơi jê̆ hăng anai nua ia xăng, ia jâu trun na nao laih. Khă hnun hai, nua lu mơta gơnam tam kiăng yua rim hrơi ƀơi Gialai ăt ƀu pơplih mơn, hăng akă hmâo gru nam hrŏ trun ôh.

Yă Nguyễn Thị Bé, juăt sĭ añăm un ƀơi Sang čơ phun Pleiku, plơi prong Pleiku brơi thâo: Năng ai ñu sa blan hăng anai, nua djop mơta añăm un hmâo đĭ nua mơng 10 rơbâo prăk truh 20 rơbâo prăk sa kg hăng ră anai ăt djă pioh mơn ƀơi rơnoh anai. Ăt tui yă Bé mơn, hơdôm hrơi rơgao, nua gơnam ƀong kơ un đĭ lu ngă prăk mă yua amăng bruă rông un đĭ lu. Bruă ia xăng ia jâu trun ƀu ngă bơdjơ̆ nao lu mơn nua añăm un yua kơ gơnam anai hluai tui kơ nua un sĭ hơnong sa drơi.

“Ră anai pô čuh tă un ba hyu sĭ ƀu trun nua hnĭ ta thâo trun nua. Kâo mă nua un ră anai đĭ nua giong hlong tui anun hlao, ƀu trun dong tah. Añăm un hmâo rơmuă hăng asar mơnong djuai hiam, djuai sa lĕ 125 rơkâo prăk sa kg, tơlang sŭ mơda lĕ 160 rơbâo prăk, 155 rơbâo prăk sa kg. Lu djuai biă, mơnong asar ƀơi tŏng tlôn lĕ 110 rơbâo prăk sa kg. Ră anai sĭ ƀu hmâo mơnuih blơi lĕ ta blơi ƀiă hĭ đôč, bơ̆ ră anai ƀing čuh tă hyu ba hyu sĭ gơñu ƀu gưt trun nua ôh hiưm ta thâo trun nua sĭ”.

Hơdôm gơnam kiăng yua rim hrơi ƀơi sang čơ hơđăp pơ̆ plơi prong Pleiku ăt akă trun mơn

Tui hăng yă Nguyễn Thị Dung, pô anih sĭ mơdrô Dung Dung ƀơi Anih sĭ mơdrô phun plơi prong Plieku, năng ai ñu 3 blan hăng anai, anih anom sĭ mơdrô mơng ñu bưp lu tơlơi tơnap amăng sĭ mơdrô, hơdôm mơta gơnam leng kơ đĭ nua năng ai ñu 10% nua ngă mrô mơnuih blơi trun. Ăt tui hăng yă Dung mơn, yua kơ hrơi pơkôl nua mơng hră pơ-ar kơplah wah pô rông, pô ba hyu sĭ, anom sĭ mơdrô hăng anih pơdă sĭ bruă hrŏ trun akă dưi ngă tui mơtăm ôh.

“Ră anai ƀiă mơnuih blơi biă, bruă sĭ mơdrô mơng hơdôm mơnuih sĭ mơdrô anet ăt ƀiă mơnuih blơi mơn. Yua kơ ră anai gơnam tam ia xăng, ia jâu leng kơ đĭ nua, mơnuih ƀôn sang ƀu hmâo prăk pơhrui glăi lu anun gơnam tam sĭ hmâo ƀiă hloh bơhmu hăng hlâo adih”.

Mơnuih ƀôn sang Gialai nao pơ̆ siêu thị pioh blơi prăp gơnam hăng nua lăp djơ̆

Yap mơng akô̆ blan 7 truh ră anai, ia xăng amăng dêh čar hmâo hrŏ trun hăng abih bang rơnoh hrŏ trun giăm truh 7 rơbâo prăk. Khă hnun hai, kơđai glăi hăng nua ia xăng, ia jâu dưi pơplih pơkra hrŏ trun, nua hơdôm mơta gơnam ƀong kah hăng mơnong, akan , añăm hla rok hơbơi pơtơi, bôh troh ƀơi hơdôm bôh sang čơ mơng hlâo ƀơi plơi prong Pleiku, tơring čar Gialai ăt ƀơi rơnoh lu mơn ngă mơnuih blơi yua bưp tơlơi tơnap lu biă. Yă Lê Thị Hoa, dô̆ ƀơi phường Phù Đổng, plơi prong Pleiku, lăi pơthâo, hăng nua hơdôm mơta gơnam yua rim hrơi ăt đĭ lu kah hăng ră anai mơn, ñu khom hơdeng ƀiă rim wot nao čơ.

“Djop mơta leng kơ pơmă hloh bơhmu hăng hlâo adih, kah hăng ia rơmă, djop mơta... Hlâo adih kâo blơi sa čơnăt añăm hla rok hmâo nua 5 rơbâo prăk ră anai đĭ truh kơ 7 rơbâo prăk. Djop mơda pơmă hloh lĕ bruă blơi yua khom hơdeng ƀiă, ƀu djơ̆ kah hăng hlâo adih ôh”.

Khul wai lăng bruă sĭ mơdrô tơring čar Gialai pel ĕp anô̆ klă gơnam tam kiăng pơgăn gơnam ngă mă ča, gơnam ngă ƀu klă

Yă Châu Hoàng Thy, Kơ-iăng Khua Siêu thị Coopmark Pleiku brơi thâo, ƀơi anăp tơlơi pơplih phrâo mơng nua ia xăng, ia jâu, hơdôm bôh siêu thị hmâo gum hrom hăng hơdôm bơnah sĭ gơnam kiăng hmâo kơčăo bruă hrŏ trun nua gơnam pơ̆ anăp anai truh kơ hơdôm djuai gơnam juăt yua rim hrơi. Amăng anun đing nao ngă hơđong nua kah hăng djop mơda braih, añăm mơnong hlô, sa dua mơta ia tơsâu rơmô, djop mơta djuai gơnam pơƀâo añăm, ăt kah hăng djop djuai gơnam ƀong pơkon.

“Bing gơmơi hmâo djru mơnuih blơi yua kah hăng mă yua jơlan hơdră blơi lu amra sĭ rơgêh brơi, blơi sa brơi sa budah jơlan hơdră mơ̆ hrŏ trun 50%. Lơm 2 rơwang hrơi tơjuh ƀing gơmơi glăk hmâo sa anô̆ djă pioh blơi prăp, amăng anun ƀing gơmơi ba djop anăn gơnam năng ai ñu rơbêh kơ 3000 mơta gơnam gum hrom hơdôm jơlan hơdră hơđong nua kiăng djru mơnuih blơi yua amăng hơdôm hrơi bruă bơwih ƀong sĭ mơdrô gơnam đĭ nua lu kah hăng ră anai. Kah hăng gơnam mơng ƀing gơmơi: mơnong un, rơmô, mơnŭ bip ăt kah hăng akan hơdang, añăm hla rok, hơbơi pơtơi boh troh, ƀing gơmơi ăt ƀu đĭ nua mơn amăng hơdôm hrơi đĭ nua kah hăng ră anai”.

Kiăng wai lăng anih anom sĭ mơdrô, kơdŏng hơdôm bruă ngă soh tơlơi phiăn pơkă amăng bruă sĭ mơdrô, hrom hăng anun hơđong nua sĭ gơnam tap, Anom wai lăng anih anom sĭ mơdrô tơring čar Gialai hrom hăng hơdôm anom bruă bơdjơ̆ nao kơtưn pel ĕp, lăng tui anih anom sĭ mơdrô. Biă ñu, anom đing nao pel ĕp, wai lăng hơdôm mơta gơnam kiăng yua rim hrơi kiăng pơhlôm bôh tŭ yua kơ mơnuih blơi yua, djru djă hơđong nua gơnam tam. Ơi Lê Hồng Hà – Khua Anom wai lăng anih anom sĭ mơdrô Gialai, brơi thâo:

“Hăng gơnam blơi yua lăi hrom ƀơi anih anom sĭ mơdrô amăng dêh čar biă ñu mă yua gơnam pơkra amăng dêh čar ta. Gơnam anai phun ñu djop tui tơlơi rơkâo mơng mơnuih ƀôn sang. Khă hnun hai hăng gơnam ƀong huă nua đĭ lu, sa dua čô mơnuih biă ñu lĕ ba hyu sĭ hơdôm gơnam tam ƀu hiam, ƀu rơđah phun akha. Rơgao kơ pel ĕp ƀing gơmơi ăt thâo mơn lu tơlơi bơdjơ̆ nao tơlơi anai kah hăng sik blơi dŏp, ƀeñ kĕo... Hrom hăng anun kơtưn pel ĕp hăng hơdôm mơta gơnam bơdjơ̆ nao gơnam blơi yua lăi hrom kiăng hmao thâo hăng pơsir tơpă hăng hơdôm bruă ngă soh pioh pơhlôm bôh tŭ yua kơ mơnuih ƀôn sang, anom bơwih ƀong ăt kah hăng mơnuih blơi yua”./.

            Hoàng Qui: Čih – Siu H’ Prăk: Pơblang