VOV4.Jarai - Mơguah lơ 3/6, ƀơi plơi prong Pleiku, Jơnum min mơnuih ƀôn sang tơring čar Gialai pơphun ngă Lơphet pok phun Blan mă bruă yua kơčơđai muai tơring čar Gialai thun 2022.

Khua Jơnum min mơnuih ƀôn sang tơring čar Gialai ƀơk prăk djru hrăm hră kơ čơđai tơnap hrưn đĭ amăng hrăm hră

Hăng anăn ñu “Gum tơngan hrom pơgang čơđai muai, truh pơhiăp pơgang, pơgăn tơlơi ngă sat, taih amang ƀing čơđai” blan mă bruă yua kơ čơđai muai thun anai ƀơi Gialai, pơphun truh abih lơ 30/6 kiăng kơtưn tơlơi pơmin, bôh thâo mơng čơđai muai, sang anô̆, plơi pla kơ gum tơngan hrom pơgang čơđai muai; hmao lăi pơhing, ƀom ƀing ngă sat, taih amang, kơtư̆ juă pran mă bruă čơđai muai; pơphun hơdôm anih pơtô brơi čơđai muai bôh thâo amăng tơlơi hơdip mơda, pơgang pô, pơgang, pơgăn arăng ngă sat, tơlơi truh rơka ruă hăng hơdôm tơlơi bơdjơ̆ nao. Rơngiao kơ anun, blan mă bruă yua kơ čơđai muai ƀơi tơring čar Gialai anăp nao bruă pơhlôm tal pơdơi prong pơhlôm klă, yâu mơ-ak hăng lu bruă mă pơhrăm drơi pô, ngui ngor; pơdơi pơdă; iâu pơthưr abih bang khul grŭp, rim mơnuih gum tơngan hrom djru keh prăk kơ čơđai muai tơnap tap, ƀu hmâo hlơi gơnang./.

Siu H’ Prăk: Pơblang