VOV4.Jarai - Mơguah lơ 14/6, ƀơi plơi prong Pleiku, tơring čar Gialai pơphun Jơnum pơpŭ mơnuih brơi drah gum djru thun 2022. Tui hăng Grŭp črâo ba pơsur brơi drah gum djru tơring čar Gialai, mơng akô̆ thun 2021 truh ră anai, tơring čar hmâo pơphun laih 125 tal brơi drah gum djru, tŭ mă giăm truh 24 rơbâo anung drah.

Hơdôm bruă mă prong kah hăng “Jơnum ngui Bơnga mriah”, “Hrơi abih bang mơnuih ƀôn sang brơi drah gum djru”, “Hơdôm tơdjoh drah mriah bơyan pơdơi prong”, “Bruă mă mriah”, ngă pơhư̆č hơdôm rơbâo čô mơnuih apăn bruă, mơnuih mă bruă čar, khul hlăk ai tơdăm dra hăng mơnuih ƀôn sang Gialai gum hrom. Mơng ră anai truh kơ rơnuč thun 2022, tơring čar Gialai hrưn đĭ djă pioh na nao dong rim blan pơphun mơng 3 truh kơ 4 tal brơi drah gum djru, lăi pơhing dong, pơjing hơdôm grŭp mơnuih brơi drah gum djru, hơdôm khul grŭp brơi drah. Tal anai, Jơnum min mƀs  tơring čar Gialai, Grŭp črâo ba pơsur brơi drah gum djru tơring čar hmâo bơni apah pri hơdôm grup, mơnuih hăng sang anô̆ hmâo bôh than prong amăng bruă brơi drah gum djru./.  

Siu H’ Prăk: Pơblang