VOV4.Jarai - Lơ 4/7, Grŭp mă bruă Ping gah tơring čar Gialai tal 16 (rơwang bruă 2020-2025) hmâo pơphun Jơnum lok 8 (pơhư prong). Bruă jơnum pioh lu mông pơsit hăng gum pơhiăp kơ 2 hră čih tơlơi lăi pơthâo glăi bruă hrŏ trun tañ hăng kơjăp phik mrô sang anô̆ ƀun rin amăng neh wa djuai ania ƀiă rơwang mơng thun 2017-2020 hăng pơsit jơlan gah truh thun 2025; Tơlơi lăi pơthâo glăi klah čun 3 thun ngă tui Tơlơi pơtrun pơsit kơ pơgang hăng pơlar phun jrao ƀơi tơring čar Gialai truh thun 2025, pơsit jơlan gah truh kơ thun 2030.

Kual pla phun jrao ƀơi tơring glông Čư̆ Sê, Gialai pơjing bruă mă kơ lu mơnuih mă bruă ƀơi anai

Rơgao kơ 5 thun ngă tui Tơlơi pơtrun pơsit 05 mơng Kơnuk kơna, bruă hrŏ trun ƀun rin hrom hăng hrŏ trun ƀun rin amăng neh wa djuai ania ƀiă hmâo gưl Ping gah, gong gai hơdôm gưl mơng tơring čar Gialai lăng lĕ bruă mă phun ba jơlan hlâo amăng bruă pơđĭ kyar bơwih ƀong mơnuih mơnam ƀơi tơring čar. Mrô sang anô̆ ƀun rin đơ đam tơring čar hrŏ trun 12,59%, mrô sang anô̆ ƀun rin amăng neh wa djuai ania ƀiă hrŏ trun 26,31%, hloh kơ tơhnal Tơlơi pơtrun pơsit ba tơbiă. Gah Tơlơi pơtrun pơsit pơgang hăng pơlar phun jrao ƀơi tơring čar Gialai truh thun 2025, pơsit jơlan gah truh kơ thun 2030, tơring čar ăt hmâo laih lu yak pơplih phrâo yôm phăn. Amăng anun lu anih anom amăng ƀrư̆ pơjing sa dua kual pla phun jrao hơbit, ba glăi lu prăk kak. Sa dua hơdră yak blung a brơi ƀuh tŭ yua hăng pok tơbiă sa jơlan gah phrâo djru hrŏ trun ƀun rin, pơđĭ kyar bơwih ƀong, hơđong tơlơi hơdip kơ mơnuih ƀôn sang. Kiăo tui anun, truh thun 2030, Gialai hrưn đĭ pơhư prong lŏn pla phun jrao mơng tơring čar hmâo năng ai ñu 20 rơbâo ektar./.

Siu H’ Prăk: Pơblang