VOV4.Jarai - Thun 2022, abih bang prăk yua kơ bruă hrom ƀơi Gialai lĕ 3.350 klai prăk. Truh akô̆ blan 5, tơring čar hmâo yua laih giăm truh 400 klai prăk. Jơnum min mơnuih ƀôn sang tơring čar Gialai hmâo pơdŏng laih Grŭp mơnuih hyu mă bruă pơtrut ngăn rơnoh yua kơ bruă hrom thun 2022 yua kơ sa Kơ-iăng Khua Jơnum min mơnuih ƀôn sang tơring čar ngă Khua Grŭp hăng Khua Gơnong bruă kơčăo bruă hăng tuh pơplai ngă Kơ-iăng Khua Grŭp. Jơnum min mơnuih ƀôn sang tơring čar Gialai rơkâo Gơnong bruă kơčăo bruă hăng tuh pơplai gum hrom hăng hơdôm gơnong bruă, jơnum min pel ĕp hơdôm anom bruă, plơi pla ngă tui kaih rơwang bruă, pơsir prăk kaih kiăng hmâo tơlơi pơplih ngăn drăp djơ̆ hloh; rơkâo khua hơdôm tơring glông, plơi prong črâo ba kơjăp, hmao tlôn pơtlaih tơlơi tơnap, tơlơi gun pơsir anih anom pioh pơkra, pơ ala glăi, pơdŏng glăi hơđong anih anom dô̆, pơsir hmao tlôn tơlơi ƀom kiơng, pơjing tơlơi djơ̆ pran hrom mơng mơnuih ƀôn sang amăng pok pơhai rơwang bruă. Hơdôm pô tuh pơplai rim rơwang hrơi tơjuh lăi pơthâo glăi rơnoh bruă ngă tui, rơnoh pơsir prăk mă yua rim rơwang bruă, rim jơlan hơdră./.

Siu H’ Prăk: Pơblang