VOV4.Jarai - Kơnong kơ hmâo sa blan dong lĕ truh tal pơplông mă ƀăng gưl 3 dêh čar ta thun 2022. Gơnong bruă pơtô pơhrăm tơring čar Gialai glăk ngă klă bruă kơtưn pel ĕp, lăng tui, pơhlôm tal pơplông mă ƀăng gưl 3 dêh čar thun 2022 pơphun pơhlôm, tơpă. Gum hrom tal pơplông thun anai, đơ đam tơring čar Gialai hmâo rơbêh kơ 14.100 čô čơđai ngă hră rơkâo pơplông: amăng anun hmâo giăm truh 13.000 čô čơđai gưl 3, 384 čô čơđai hrăm glăi mơng sang hră pơtô pơhrăm čơđai hrăm akă abih gưl 3, dô̆ glăi lĕ čơđai mơng hlâo pơdơi rơkâo pơplông.

Pơhrăm glăi kơ čơđai kiăng prăp lui pơplông mă ƀăng gưl 3 dêh čar pơ̆ anăp anai

Amăng mrô čơđai rơkâo pơplông hmâo rơbêh kơ 13.000 čô čơđai rơkâo ruah đĭ đại học, cao đẳng. Hluai tui mrô čơđai pơplông, tơring čar Gialai hmâo ba tơbiă laih jơlan gah hăng 40 bôh anih pơplông sit nik (đĭ sa bôh anih pơplông bơhmu hăng thun 2021) hăng 623 bôh anih pơplông, iâu pơhrui 2.400 čô mơnuih apăn bruă, nai pơtô, mơnuih mă bruă gum hrom ƀơi anăp amăng hơdôm grŭp mơng Khul wai lăng čơđai pơplông. Ră anai, Gơnong bruă pơtô pơhrăm hmâo črâo ba hơdôm bôh sang hră ngă giong Jơlan hơdră pơtô pơhrăm tui djơ̆ kơčăo bruă. Hrom hăng anun, hơdôm bôh sang hră pơpha čơđai kiăng hmâo hơdôm hơdră pơplông ba glăi bôh tơhnal hloh, djru ƀing čơđai phing kơ pran jua lom yak mut pơplông./.

Siu H’ Prăk: Pơblang