Ƀơi mông jơnum pơphun bruă mă, Khul git gai mơ̆ng dêh čar brơi hyu hơduah ĕp, rŭ tơlang 7000 čô tơhan pơsăn drơi hăng kiăng pơtong glăi anăn năng ai 18.000 čô tơhan pơsăn drơi, pơčrang mơ̆ng tơlang hơmâo rŭ glăi mơ̆ng hlâo. Hrơi blan ngă tui bruă gir run anai mơ̆ng lơ 15/3/2026 truh abih lơ 27/7/2026.

Pơhiăp ƀơi mông jơnum, jak iâu ngă bruă ječ ameč anai, Kơ-iăng khua dêh čar, yă Phạm Thị Thanh Trà rơkâo djop ding jum, anom bruă, tơring čar, plơi pla pơphun ngă tui tơpă hnơ̆ng, djop hăng glăm ba, amăng anun, pơtum nao kơ bruă mă phun kah hăng, pơtong rơđah bruă mă anai, jing bruă kơđi čar yom phara; kiăng čih pơkra tơlơi phiăn krăp lăng, sem ten hnơ̆ng mă bruă kiăng ba glăi boh tŭ yua sit nik; pơblih phrâo hơdră mă bruă, anăp nao ba yua boh thâo ia rơgơi phrâo; pơđĭ tui tơlơi gơgrong ba mơ̆ng ling tơhan blah ngă hăng pơtum lu khul mơnuih mơnam ngă hrŏm, kơtưn bruă ngă giăng mah jar kmar, boh nik ñu hơdôm dêh čar Lao hăng Kur.