Nai đah kơmơi Lê Hiếu Vy, Khua hlăk ai Sang hră gưl klâo Ngô Gia Tự (phường Phú Yên) jing sa čô ñu yơh pơ Dak Lăk hơmâo tơbiă anăn mă Pri Lý Tự Trọng thun 2026. Ñu leng ĕp jơlan pơplih phrâo ngă pơhưč, pơtum ƀing čơđai sang hră, hlăk ai mut phung. Amăng hrơi hơjan kơthel ia dăo kơtang rơnuč thun 2025, ƀu hŭi kơ hŭi rơhyưt, amai Vy iâu pơtum rơbêh 30 čô hlăk ai mut phung nao pơ plơi pla ia dăo kơtang, ƀu thâo tơbiă hyu, ba nao gơnam kơ neh met wa glăk kơƀah asơi huă, rơ-ot rơngoh. Pran jua ngă bruă kơsung nao pơ anăp mơ̆ng ñu ƀu kơnong djru neh met wa găn rơgao tơnap tap đôč ôh, ăt hmư̆ ư hiam biă amăng čơđai sang hră, râu mơdưh pran jua, tơlơi thâo pơmin hăng thâo khăp pap.

Hăng amai Vy, pơtrut pran jua hiam hăng gum ngă hrŏm hăng hlăk ai tơdăm dra jing bruă pơdjuai pơjeh hiam kơ pran jua gơgrong bruă, thâo khăp pap, djru nao rai tơdruă amăng rim čô čơđai sang hră hăng hlăk ai: “Lơ̆m gum ngă bruă lĕ ta ngă bruă hăng ƀing čơđai. Ƀuh ta ngă lĕ gơñu ngă mơn, gơñu lăng ta ngă jing thâo pơmin, ngă mă pô, hor či nao djru, jing ta iâu pơthưr, ƀu djơ̆ ta git gai, pơđar khŏm ngă ôh. Čơđai sang hră čih anăn nao djru, laih anun lơ̆m iâu pơthưr leng kơ hơmâo lu hloh kơ rơnoh pơkă năng blung. Rim bruă mă jing tơlơi lăp hơdor biă mă hăng ƀing čơđai”.

Yua ngă bruă thâo pơčeh, tŭ yua, rơwang thun 2020-2025, Hlăk ai sang hră gưl klâo Ngô Gia Tự jing sa amăng hơdôm boh sang hră hmư̆ hing mơ̆ng tơring čar Dak Lăk. Kơnong amăng thun 2025, Sang hră Ngô Gia Tự hơmâo 8 čô čơđai hơmâo pơmut Ping gah.

Hrŏm hăng sang hră, bruă gah hlăk ai glăk hơmâo ngă mơn ƀơi Dak Lăk hăng akŏ phun ñu lĕ pơlir bruă mă hăng tơlơi kiăng mơ̆ng plơi pla. Ƀơi phương Buôn Ma Thuột, tơdơi kơ mă bruă tui gong gai 2 gưl, hlăk ai tơdăm dra hơmâo jao bruă rơđah rơđông, djru ba mơnuih ƀôn sang ngă hră online, pơtô brơi mă yua boh thâo mrô đam anih dŏ mơtăm. Tui hăng amai Lê Thị Anh Trâm, Khua hlăk ai phương Buôn Ma Thuột, hlăk ai ƀu ngă brơi hlao ôh, gơñu pơtô brơi kiăng neh wa thâo tut, pơkra mă pô amăng măi: “Amăng hrơi blan rơgao, hlăk ai phương ăt akŏ pơdong khul djru ba ƀơi Anih ngă hră ăt kah hăng pok pơhai ƀơi dŏp 89 boh plơi pla, ƀut plơi. Ƀu pơdơi yah bruă djru ngă brơi đôč ôh, ăt ngă tom mơnuih ƀôn sang mơtăm kiăng pơtô brơi dưi mă yua boh thâo mrô, đah mơ̆ng thâo ngă mă pô amăng plang internet”.

Amăng hrơi mông mă bruă tui gong gai dua gưl, tơlơi kiăng hăng khul hlăk ai lĕ khŏm ruah djơ̆ bruă, jao djơ̆ pô, pơtrut tui tơlơi gơgrong mơ̆ng hlăk ai plơi pla. Lơ̆m bruă hơmâo pơsit rơđah, bruă či ngă huăi luk puk dong tah, ñu jing sit nik, kiăo tui tơlơi kiăng.

Ƀu hơmâo sui ôh, grup hlăk ai djru bruă ƀơi Dak Lăk hơmâo djru ba hơdôm pluh rơbâo čô mơnuih dưi mă yua plang ngă hră online hăng hơdôm glông yua boh thâo mrô. Anai jing khul yom biă, pơtruh gong gai mrô hăng ană plơi pla, biă ñu pơ kual ataih, asuek. Ayong Lương Minh Tùng, Khua hlăk ai tơring čar Dak Lăk pơsit, kiăng djơ̆ hăng tơlơi kiăng phrâo, Khul hlăk ai kiăng pơplih hơdră ngă bruă, kiăo tui tơlơi hơmâo sit:  “Anom bruă hlăk ai khŏm pơplih mơ̆ng phun atur yơh. Ƀing khua hlăk ai pơ să, plơi pla khŏm pơplih bruă kơđi čar. Thun anai lĕ ƀing khua hlăk ai să ruah mă hơdôm bruă akŏ phun či ngă, kiăo tui tơlơi hơmâo sit mơ̆ng plơi pla, biă ñu lĕ tơdơi kơ pơmut hrŏm, mơ̆ng anun pơhlom djŏp bruă tơnap, bruă kiăng ngă khŏm hơmâo hlăk ai amăng gong gai 2 gưl”.

Ơi Y Giang Gry Niê Knơng, Kơ-iăng khua Ping gah tơring čar, Khua Jơnum min djŏp djuai ania mơnuih mơnam Việt Nam tơring čar Dak Lăk lăi, amăng mông anai, khul hlăk ai kiăng pơplih kơtang hloh bruă mă, lăp djơ̆ hăng tơlơi đĭ kyar phrâo mơ̆ng rơnuk anai. Biă ñu lĕ, hlăk ai tơdăm dra, hlăk ai khŏm jing khul nao hlâo pơčeh phrâo, pơplih boh thâo mrô, hơdôm bruă yom, akŏ phun hăng tơlơi đĭ kyar mơ̆ng tơring čar, mơ̆ng lŏn ia. Hăng tơlơi thâo rơgơi, tañ thâo hluh hăng thâo mă yua boh thâo phrâo, djru đĭ kyar bơwih ƀong huă - mơnuih mơnam hăng pơsit tơlơi gơgrong mơ̆ng ƀing ngă pô wai lăng lŏn ia pơ anăp anai: “Pơplih boh thâo mrô hơmâo pơsit jing tơlơi pơplih prong laih anun hlăk ai yơh djă hla kơ nao hlâo ngă bruă anai. Ƀu kơnong nao hlâo mă yua boh thâo ia rơgơi đôč ôh, ăt jing khul akŏ phun djru mơnuih ƀôn sang ngă hră amăng plang internet, pơplih bruă ngă hră. Bruă kiăng ngă mơ̆ng Khul hlăk ai lĕ ba boh thâo mrô glăi pơ plơi, pơtô ba neh met wa mă yua tơlơi rơgơi phrâo, gir lŏm hĭ tơlơi phara, pleh ploh plah wah ƀon prong hăng plơi pla anet, plơi ataih asuek”.

Amăng mông kiăng đĭ kyar jai hrơi prong tui, tơring čar Dak Lăk pơsit, hlăk ai jing sa amăng hơdôm khul yom biă đah mơ̆ng dưi kơtưn đĭ kyar, laih dong jing gai pơkă đĭ kyar hơđong kjăp. Yua hnun,  bruă râu mơdưh tơlơi gơgrong bruă tơlơi kơtưn ngă bruă gum pơgôp mơ̆ng hlăk ai amra jing tơlơi yom phun, djru akŏ pơjing Dak Lăk đĭ kyar tañ hăng hơđong kjăp./.