Amăng 11 blan thun 2022, Khul apăn bruă pơgang dlai tơring čar Kontum hmâo ĕp ƀuh 83 mơta tơlơi ngă soh gah Phiăn pơgang dlai tlô, pơhrui mă pơkŏng rơbêh kơ 419m3 kyâu djop mơta, kual dlai răm rai rơbêh kơ 32 ektar. Amăng mông tơña Khul pơ ala mơnuih ƀôn sang tơring čar Kontum, lu khua pơ ala pơtŏng sit hmâo tlaih lui laih bruă wai lăng, kơƀah bruă gơgrong hăng đa lĕ djru ƀing dŏp mă kyâu dong.

Lăi glăi ƀơi anăp Khul pơ ala mơnuih ƀôn sang tơring čar, Khua Jơnum min mơnuih ƀôn sang tơring čar Kontum pơtŏng sit pioh ba truh tơlơi ngă soh anun lĕ yua bruă git gai, črâo ba mơng gưl Ping gah, Gong gai sa dua anih anom akă đing nao djơ̆ rơnoh; Bruă gơgrong mơng sa dua čô mơnuih apăn bruă wai lăng dlai akă kơjăp; Ăt dô̆ mơn tơlơi tlaih lui wai lăng, djru ƀing hyu mă kyâu, dŭ pơgiăng kyâu ƀu djơ̆ phiăn. Jơnum min mơnuih ƀôn sang tơring čar amra črâo ba hơdôm gơnong bruă hăng hơdôm anih anom ƀơi anăp lĕ gưl tơring glông hăng gưl să kiăng dưi djă pioh dlai tlô. Kơtưn hloh dong bruă hyu tir, wai lăng biă ñu hơdôm bơyan ngă đang hmua./.