VOV4.Jarai - Ƀơi ƀirô mă bruă Kơnuk kơna, Kơ-iăng Khua dêh čar ta ơi Vũ Đức Đam git gai mông jơnum lăng nao rai mơng ataih đơ đam dêh čar ta kơ tơlơi pok bah amăng sang hră ƀơi hơdôm bôh tơring čar, ƀôn prong. Klah čun mông jơnum, Kơ-iăng Khua dêh čar ta lăi rơđah: Bruă nao hrăm mơng čơđai lĕ yôm phăn biă, ƀu djơ̆ knong kơ lom hmâo klin ngă ôh mơ̆, wot lom ƀu hmâo klin hai. Čơđai dô̆ pơ̆ sang sui amra ba truh tơlơi ƀu klă ƀu hmao thâo ôh; ƀu djơ̆ kơnong bruă hrăm hră, bôh thâo ôh mơ̆, ñu dô̆ bơdjơ̆ nao sui thun truh tơlơi brô̆ prong mơng čơđai dong. Pơsit bruă pơgang, pơgăn klin Covid-19 lĕ sui thun,  Kơ-iăng Khua dêh čar ta ơi Vũ Đức Đam bâo glăi pran jua khom hơkrŭ glăi hơdôm bruă pơđĭ kyar bơwih ƀong - mơnuih mơnam amăng tơlơi hơđong phrâo, hăng jơlan gah juăt hăng pơhlôm, pơplih tañ, wai lăng ba glăi bôh tơhnal klin ngă. Kơ-iăng Khua dêh čar ta hrom hăng anun pơtă pơtăn tal blung a truh bruă tlâ̆o vaccine pơgang Covid-19 kơ čơđai mơng 5 truh kơ 11 thun. Hrom hăng anun, tŭ ư bôh nik čơđai nao hrăm ha amăng plĕ lĕ mrô mơnuih ƀă kơman đĭ lu; yôm phăn lĕ dưi wai lăng rơnoh lar hyu, hmâo jơlan gah pơsir mơnuih ƀă kơman F0, F1 lăp djơ̆./.

Siu H’ Prăk: Pơblang