Amăng jua tơlơi adôh đơđik, bơngač rơđah hăng abih bang anih pơdah tơlơi adôh suang dưi pơhrôp hăng gru rup gơnam kơphê pơkra phara mơ̆ng plơi prong čư̆ siăng Plei Ku, mơnuih mă bruă mơ̆ng Sang bruă bơwih ƀong mơnuih ƀôn sang BaKa (Plei Ku, Gia Lai) dik dăk lăi pơthâo gơnam tam. Yă Nguyễn Thị Thanh, Kơ-iăng Khua Sang bruă, brơi thâo, bruă mă anai hmâo pơphun rim hrơi amăng giăm hmâo 2 thun hăng anai. Anai ăt lĕ yak pok phun djru anom bơwih ƀong lăi pơthâo hăng ba gơnam Gia Lai truh tơngan mơnuih blơi yua ƀơi djop anih amăng dêh čar. Kơnong ƀiă hrơi, anih pơdă gơnam mơ̆ng anom bơwih ƀong hmâo ngă pơhưč laih hơdôm rơbâo čô mơnuih lăng tui, dưi pơsit rơbêh 4,2 bôh pơtŭ. Yă Nguyễn Thị Thanh brơi thâo, hrŏm hăng pok prong anih anom sĭ mơdrô, anom bơwih ƀong ăt ngă klă mơn bruă pla pơkra, pơđĭ tui anô̆ klă hiam gơnam, pơplih kơdung anung gơnam hăng đing nao bruă bơwih brơi pơsur kơ mơnuih blơi yua.

“Rim mlăm, ƀing gơmơi hmâo dua čô mơnuih livestream mơ̆ng 7 mông mơmot truh kơ 22 mông mlăm. Rim mông live leng kơ prăp lui tŏng ten gah bơngač rơđah, micro, hơdră lăi pơthâo. Anih pơdah ƀuh pô mă bruă triăng, gơñu djru hăng hơdôm voucher brơi đôč prăk pơgiăng hyu pioh mơnuih blơi, blơi gơnam lơm glăk live. Ră anai, hơdôm anih pơdă gơnam mơ̆ng BaKa amăng măi mok leng kơ pơsit mơ̆ng 4,5 truh 4,9 bôh pơtŭ. Ƀing gơmơi đăo kơnang lĕ mă bruă tơpă amra pơhrui glăi bôh tơhnal klă”.

Hrŏm hăng kơphê, ră anai hmâo lu gơnam pơkra phara mơ̆ng Gia Lai kah hăng ia hni, tiu, bôh nông sĭ tui jơlan măi mok, hăng mrô pơhrui glăi na nao rơbêh kơ 8% rim thun. Amăng jơlan hơdră pơplih mrô, Gia Lai hmâo djru laih anom bơwih ƀong pơjing 255 website sĭ gơnam tui jơlan măi mok pioh pơsit anăn gơnam, hơduah ĕp anih anom hăng anom bơwih ƀong amăng măi mok mrô. Rơngiao kơ anun, rơbêh kơ 90 mrô anăn rơkâo sĭ gơnam tui jơlan măi mok dưi pơjing brơi kơ 30 bôh anom bơwih ƀong hmư̆ hing klă. Ơi Phan Thanh Thiên, Kơ-iăng Khua Khul anom bơwih ƀong hlăk ai Gia Lai, lăi pơhing:

“Anai lĕ glông sĭ gơnam klă kơ tơring čar hăng kual Dap Kơdư. Khul amra djru mơnuih amăng khul ƀơi Gia Lai rim blan jak iâo hơdôm KOL, KOC, tiktoker pioh sĭ gơnam, djru anom bơwih ƀong pơtrut kơtang prăk pơhrui glăi”.

Hơdôm thun rơgao, bruă sĭ mơdrô tơring čar Gia Lai hmâo pơphun lu mông jơnum, pơhrăm brơi kiăng thâo kơjăp hăng bôh thâo brơi kơ hơdôm bôh anom bơwih ƀong, anom mă bruă hrŏm hăng mơnuih ngă đang hmua amăng bruă mă yua măi mok sĭ mơdrô gơnam tam. Phrâo anai, Gơnong bruă sĭ mơdrô tơring čar Gia Lai gum hrŏm hăng Khul anom bơwih ƀong hlăk ai Gia Lai hăng sa anih pơdă sĭ gơnam tui jơlan măi mok pơphun dua mông sĭ gơnam megalive (anih pơdă sĭ tui jơlan măi mok prong hloh). Lăp đing nao, ƀơi hơdôm mông anai, Khua Gơnong bruă sĭ mơdrô tơring čar ƀơi anăp lăi pơthâo hăng mơnuih blơi hrŏm hăng mơnuih pơ ala kơ anăn gơnam. Bôh tơhnal, 12.700 pok hră rơkâo blơi gơnam hmâo sĭ laih hăng abih bang nua ñu 1 klai 800 klăk prăk. Khă hnun hai, tui hăng ơi Phạm Văn Binh, Khua Gơnong bruă sĭ mơdrô tơring čar Gia Lai, bruă sĭ gơnam tui jơlan măi mok ƀơi tơring čar ăt amăng rơwang pok phun mơn. Ră anai phrâo hmâo 40% amăng mrô 5.000 bôh anom bơwih ƀong ƀơi tơring čar hmâo website sĭ gơnam tui jơlan măi mok. Samơ̆ bôh tơhnal hơdôm mông sĭ mơdrô tui jơlan măi mok phrâo rơgao brơi ƀuh, gơnam mă mơ̆ng đang hmua Gia Lai hmâo hơđăp ba glăi prăk pơhrui glăi lu amăng jơlan sĭ gơnam tui măi mok:

“Dua mông livetream phrâo rơgao brơi ƀuh tơlơi đing nao prong mơ̆ng mơnuih blơi. Tơlơi anai brơi ƀuh bruă sĭ gơnam tui jơlan măi mok, khă phrâo hnuă, ăt hmâo mơn anô̆ gal prong ƀơi Gia Lai. Ƀing gơmơi amra tô nao rai hăng tiktok hăng Shopee pioh pơjing hơdôm hrơi sĭ gơnam, rơwang hrơi tơjuh sĭ gơnam megalive tui anăn ñu phara gah gơnam mă mơ̆ng đang hmua pơkra phara mơ̆ng Gia Lai. Ră anai, Gơnong bruă sĭ mơdrô tơring čar glăk ba tơbiă kơ Ding jum sĭ mơdrô pơjing anih djru sĭ gơnam tui jơlan măi mok, jing anih tô nao rai anom bơwih ƀong ƀơi Gia Lai”.

Bruă sĭ mơdrô tui jơlan măi mok glăk jing jơlan tô nao rai yôm phăn, ngă brơi gơnam mă mơ̆ng đang hmua Gia Lai ba hyu ataih hloh truh pơ̆ dêh čar arăng. Kơnang kơ thâo pơplih tañ hăng mă yua anô̆ gal mơ̆ng bruă sĭ mơdrô tui jơlan măi mok hăng kơđai glăi, hơdôm tơlơi lăi glăi mơ̆ng mơnuih blơi yua djru anom bơwih ƀong hăng mơnuih ngă đang hmua jai ngă klă kơ gơnam mơ̆ng pô. Anai lĕ pok phun bă kơ tơlơi čang rơmang kơ sa bruă đang hmua rơnuk anai hăng kơjăp ƀơi tơring čar./.