Ƀơi să Ea Knuêč, tơring čar Dak Lak, tal blung a mơnuih ƀôn sang ƀuh sa čô Khua git gai Ping gah să mut hrŏm mông livestream sĭ boh sầu riêng. Khua git gai Ping gah ƀu djơ̆ kơnong pơhưč hăng ƀô̆ mơta hiam bơnai, jê̆ giăm đôč ôh mơ̆ ñu ăt thâo bơră ruai tom mơnuih ngă hmua amăng plơi pla hăng boh pơhiăp tơlơi Êđê dong:

Bruă khua apăn akŏ gưl să gum hrŏm sĭ boh sầu riêng tom mơnuih ngă hmua jing tơlơi pơsit kơđi čar kơtang hloh: gong gai phrâo ƀu djơ̆ kơnong “ba tơbiă tơlơi pơtrun pơsit” đôč ôh mơ̆ ăt gum hrŏm hăng hơdôm bruă mă sit nik. Khua git gai Ping gah să Ngô Thị Minh Trinh ƀu mlâo lơm dŏ ƀơi anăp măi dar mă rup, hrŏm hăng neh met wa lăi pơthâo boh sầu riêng, pơblang brơi bruă pơkra hăng jao gơnam. Dŏ giăm ñu lĕ sa čô yă tha 70 thun tal blung a djă micro livestream, pơ-ư ang lơm hơmâo gong gai ƀon lan djru sĭ gơnam tam. Amăng mông livestream pơhưč hơdôm rơbâo čô mơnuih kiăo tui lăng, hơdôm rơtuh čô mơnuih rơkâo blơi, hăng tơlơi yôm ƀiă dong-sa tơlơi pơmĭn wai lăng phrâo hơmâo tŭ yap. Khua anom bơwih ƀong hrŏm Ngă hmua hơdjă Krông Pač-ơi Mai Đình Thọ lăng yôm bruă mă anai:

“Sa čô khua git gai Ping gah thâo hluh hăng jê̆ giăm, sit nik gum hrŏm mơnuih ngă hmua. Anai lĕ tơlơi pơplih tong ten, mơng tơlơi git gai truh pơ gum hrŏm”.

Mơnuih ƀôn sang ƀơi kual Dơnung tong krah-Dap kơdư đăo gơnang gong gai ƀon lan 2 gưl phrâo ƀu djơ̆ kơnong mơng sa bruă đôč ôh ăt hơmâo lu bruă, lu tơlơi pơplih phrâo; ƀuh tơlơi pơplih tong ten amăng bruă sit nik.

Ƀơi să Ia Băng hăng Mang Yang (Gia Lai), gong gai gưl să hơmâo jao mut hrŏm dơlăm dong amăng bruă duh prăk kak, pơhrui lŏn mơnai brơi akŏ bruă jơlan rơdêh đuăi hmar Quy Nhơn-Pleiku. Sa akŏ bruă nua ñu rơbêh 43.700 klai prăk, găn nao 17 boh să, bơdjơ̆ nao rơbêh 3.000 boh sang anŏ, hlâo anun gơnang nao gưl tơring čar. Samơ̆ tal anai, să gơgrong pơphun jơnum mơnuih ƀôn sang, đing tơnga hmư̆, gum hrŏm hăng anom bruă črâo ba kiăng pŏng gong kăng lŏn, pơkă glăi rĭm met lŏn, rĭm boh sang anŏ nao pơdong sang phrâo. Khua Jơnum min mơnuih ƀôn sang să Mang Yang-Ơi Võ Lê Xuân Thiện brơi thâo:

“Ƀing gơmơi hơmâo laih kual lŏn kiăng pơdong plơi pla phrâo giăm ară jơlan anai. Lơm să mut hrŏm dơlăm ƀiă dong, bruă pơtrut pơsur neh met wa amuñ ƀiă dong yua kơ mơnuih ƀôn sang đăo gơnang nao să pơhmu hăng ƀing rai mơng anih pơkŏn”.

Tơlơi pơmĭn “giăm ană plơi pla kiăng ană plơi pla đăo gơnang, yua kơ mơnuih ƀôn sang kiăng mơnuih ƀôn sang dong yua” hơmâo pơdah mơng bruă gong gai gưl să lêng kơ ngă bruă mơng phun, gơgrong pơsir hĭ tơnap tap kơ mơnuih ƀôn sang. Yă Lê Thị Liên, mơnuih dŏ amăng ƀut plơi 3, să Ea Bung, tơring čar Dak Lak brơi thâo: sa, dua boh sang anŏ amăng plơi pla bơrơsua mă ia amăng sui thun laih, ngă kơ bruă mah hơmâo ia mơ̆ lu hmua pơdai ăt krô kreñ. Samơ̆ lơm gong gai să phrâo mut mă bruă, nao tơl plơi pla hmư̆ djop bơnah lăi pơthâo, bruă bơrơjah sui thun anai hơmâo pơsir hĭ amăng ha hrơi.

“Khua mua să ăt abih pran jua, giăm mơnuih ƀôn sang, bơni khua mua să, yua ƀing gơñu hơmâo djru brơi ƀing gơmơi, pơsir hĭ kơđi kiăng ƀing gơmơi dưi hơdip hơđong mơ-ak, ră anai jing huăi hơget dong tah, dưi pok mă ia tui hơđăp mơn”.

Lơm gưl să pơdah pran jua giăm mơnuih ƀôn sang, gong gai gưl tơring čar ăt pơdah pran jua gum hrŏm, ngă tui tơlơi gir run bruă kơđi čar prong hloh. Ƀơi Gia Lai, mơng blan blung a pơmut hrŏm hăng ngă bruă tui hơbô̆ bruă gong gai ƀon lan 2 gưl, hơmâo lu jơlan gah pơplih phrâo: pơtrut tañ bruă pơhrui glăi lŏn mơnai pioh pơkra jơlan rơdêh đuăi hmar, man pơdong bah amăng jang jar kmar Lệ Thanh jing “amăng jang rơgơi, mă bruă tơhrơi mlăm” hăng rơkâo pơjing akŏ bruă pơđĭ kyar dơnao pơkŏng ia nua ñu 17.000 klai prăk. Khua git gai Ping gah tơring čar Gia Lai, Hồ Quốc Dũng pơsit tong:

“Kiăng ječ ameč ba tơbiă akŏ bruă klă hloh kiăng pok pơhai tañ bruă pruih ia. Ƀing apăn bruă gah ngă hmua kiăng tañ ba tơbiă tơlơi rơkâo tong ten kơ bruă anai. Tui jŭ yap jang jai brơi ƀuh, tơdah tuh pơ alin amăng kual Gia Lai (hơđăp) pơphlôm brơi kual dưi pruih ia pơprong, abih tih prăk tuh pơ alin truh giăm 17.000 klai prăk samơ̆ kiăng kah pơpha tuh pơ alin tui rĭm rơwang. Rơngiao kơ prăk mơng gơnong glông, Gia Lai ăt amra kah pơpha prăk kak, laih dong kiăng pơmĭn nao kơ bruă pơjing 1 akŏ bruă phrâo kiăng čan prăk ODA. Tơdah amăng 5 thun pơ anăp, Gia Lai ƀu pơsir hĭ bruă tơnap kơ ia pruih brơi hơdôm bruă glăk kơƀah, tơlơi anai amra ngă soh hăng mơnuih ƀôn sang”.

Tơdơi kơ pơmut hrŏm hăng Dak Nông laih dong Bình Thuận, tơring čar Lâm Đồng jing tơring čar prong hloh đơ đam dêh čar, hơmâo lu tơlơi dưi amăng kual, samơ̆ ăt dŏ lu anŏ aka ƀu klă hlơi. Hơdôm akŏ bruă pơprong kơ jơlan glông, čuah pơtâo, tơlơi gun găn mơng sui thun, giăm 100 boh să kơƀah mơnuih apăn bruă thâo dơlăm amăng djop bruă. Kiăng pơsir hĭ, tơring čar hơmâo pơkiăo nao hơdôm rơtuh čô mơnuih apăn bruă tơring čar trun nao pơ să, hăng đing nao bruă pơsir hĭ gun găn ƀơi hơdôm akŏ bruă. Ơi Lê Trọng Yên, kơ-iăng Khua Jơnum min mơnuih ƀôn sang tơring čar brơi thâo, kiăng kơ khin ngă, khin glăm ba.

“Hluai tui tơlơi gal mơng anom bruă tuh pơ alin, čan prăk kiăng pơsir rhĭ hơdôm tơlơi gun, rơkâo gơnong bruă prăk kak git gai hăng hơdôm anom bruă bơdjơ̆ nao črâo ba, pơphun jơnum kiăng pơčrông sai kơ boh thâo. Ngă tui tơlơi phiăn samơ̆ bruă mă brơi hơbot, tañ jao anom bruă tuh pơ alin kiăng ƀing gơñu pok pơhai ngă tui. Ngă tui anun kah dưi pơsir hĭ gun găn, mơ̆ tơdơi ngă tui tơlơi phiăn tuh pơ alin man pơdong rơwang thun 2025-2030 tơnap biă, ƀu dưi gơgrong ngă, ƀu lăp djơ̆ tơlơi rơkâo mơng akŏ bruă anai”.

Hơbô̆ bruă gong gai ƀon lan 2 gưl ƀơi kual Dap kơdư glăk amăng rơwang glêh tơnap hloh. Bruă pok pơhai rĭm hơdră bruă amăng rơwang anai lêng kơ bưp lu tơnap tap. Samơ̆, hơdôm bruă mă khut khăt kiăng găn rơgao, amra pioh glăi tơlơi yôm sui pơ anăp. Gong gai să khut khăt amăng bruă djru mơnuih ƀôn sang sit nik. Gong gai gưl tơring čar ƀu pơdơi pel tơlơi pơsir hơdôm bruă pơprong. Tơlơi gum hrŏm mơng dua gưl gong gai hơmâo tŏ tui hăng pran jua “anăm ngă bruă truh abih mông mơ̆ ngă bruă truh abih bruă”-glăk pơtrut pơđĭ kyar brơi kual Dap kơdư amăng rơwang phrâo. /.