Lơ 30/7, Grŭp apăn bruă Ping gah tơring čar Gia Lai pơphun Jơnum lăi pơthâo glăi bôh tơhnal Jơnum tal 12 Grŭp mă bruă Ping gah dêh čar tal 13 truh mơnuih apăn bruă phun đơ đam tơring čar. Amăng mông jơnum, ơi Hồ Quốc Dũng, Khua git gai Ping gah tơring čar Gia Lai brơi thâo, tơdơi kơ ngă tui dưm dăp glăi anom bruă čar hăng hơdai nao hơdră gong gai 2 gưl, truh ră anai, bruă gong gai ƀơi tơring čar Gia Lai mă bruă hơđong laih. Tơring čar hmâo jao laih gưl să 1.065 akô̆ bruă. Mơnuih ƀôn sang lơm hmâo tơlơi kiăng pơsir hră pơ-ar kơnong kơ nao pơ̆ să, lu ñu ngă tui ƀơi plăng internet, pơjing tơlơi gêh gal hăng pơkrem hrơi mông.

Pơ̆ anăp anai, tơring čar amra pơpha gưl pơpha bruă kơtang hloh brơi gưl să. Khă hnun hai, ră anai ăt dô̆ mơn sa dua mơta tơlơi tơnap kiăng tañ pơsir, biă ñu gah bôh thâo, rơnoh thâo mơ̆ng mơnuih apăn bruă să. Ră anai, mơnuih apăn bruă gưl să ƀơi Gia Lai biă ñu hmâo 3 ƀut: Mơnuih apăn bruă mơ̆ng tơring čar brơi nao; mơnuih apăn bruă mơ̆ng tơring glông ba trun hăng mơnuih apăn bruă ƀơi anih anom dô̆. Sa dua čô mơnuih apăn bruă akă djop tơlơi găn rơgao sit nik. Tơring čar glăk pơphun pơhrăm djru mơnuih apăn bruă gưl să tañ juăt hăng bruă mă phrâo./.