Amăng mông jơnum, ƀing pơ ala hơdôm anom bruă amăng Gong phun jua pơhiăp hơmâo pơčrông sai rơđah rơđông ƀiă dong kơ hơdôm boh tơhnal dưi ngă, laih dong lăi nao rơđah hơdôm tơlơi gun, anŏ aka ƀu klă hăng ba tơbiă hơdôm hơdră pơsir hĭ, pơhlôm amăng thun 2026 pơgiong klă bruă jao. Tŭ yap, lăng yôm hơdôm tơlơi gir run mơng hơdôm anom bruă, Khua git gai Ping gah, Khua phun Gong phun jua pơhiăp dêh čar Việt Nam ơi Đỗ Tiến Sỹ lăi pơtong: Pơ anăp anai, djop anom bruă tŏ tui pran gum pơgôp, mut hrŏm, tŏ tui pơplih phrâo boh tơhnal, hơmâo djop jơlan hơdră pôr pơhing, pơsit tong tơlơi gơgrong mơng anom bruă pôr pơhing phun gum hrŏm hăng lŏn ia ta.

Khua Gong phun jua pơhiăp dêh čar Việt Nam lăi pơtong: Thun 2026 pok pơhai lu bruă jao akŏ phun anun lĕ: Jơnum Ping gah đơ đam dêh čar tal XIV, pok pơhai tơlơi pơtrun Jơnum tal XIV, ruah Khua pơ ala mơnuih ƀôn sang dêh čar hăng Jơnum min pơ ala mơnuih ƀôn sang djop gưl, hrŏm hăng hơdôm bruă kơđi čar hơmâo pok pơhai pok prong, djop mơta mơng gưl Ping gah, gong gai truh pơ tơlơi pơtrun mơng Jơnum min pơ ala mơnuih ƀôn sang djop gưl.