Lơ 17/12, ƀơi sang bruă Kơnuk kơna, Khua dêh čar ơi Phạm Minh Chính git gai jơnum pơtŏng glăi bruă pok pơhai “Bruă mă Quang Trung” djru kơ mơnuih ƀôn sang pơsir tơlơi răm rai tơdơi kơ kơthel ia dăo, hơmâo pơtruh lăng online hăng hơdôm boh tơring čar, ƀôn prong mơ̆ng Hà Tĩnh truh pơ Lâm Đồng. Mơ̆ng bruă sem lăng, mrô sang kiăng man phrâo lu tui, ră anai hơmâo laih 1.622 boh sang hơmâo man pơdong, đĭ 651 boh sang pơhmu hăng mrô lăi pơthâo hlâo anun.

Pơpŭ bơni kơ hơdôm boh tơring kah hăng Dak Lăk, Gia Lai, Đà Nẵng gir ngă bruă amăng hrơi blan rơgao, Khua dêh čar lăi pran jua “Bruă mă Quang Trung” ƀu hơmâo jua phao kơtuang ôh, samơ̆ khŏm truh kih, kiăng mơnuih ƀôn sang đăo kơnang tañ hơđong glăi tơlơi hơdip mơda. Tơlơi kiăng ngă lĕ khŏm ngă giong bruă pơkra glăi sang dŏ hlâo kơ lơ 31/12/2025 hăng man phrâo khŏm giong hlâo kơ lơ 31/1/2026. Khua dêh čar kiăng hơdôm boh tơring, biă ñu Gia Lai hăng Dak Lăk, gir ngă kơtang hloh dong; laih dong jao kơ Ding jum Kông an, Ding jum ling tơhan, Khul hlăk ai djru ba, pơtrut tui tơlơi pơmin gum djru nao rai tơdruă đah mơ̆ng tañ hơđong anih dŏ, hơđong bruă mă./.