Ƀrô hrơi ngui Noel thun 2025, pơ ala kơ Jơnum min djŏp djuai ania mơnuih mơnam Việt Nam, Ding kơna Ding jum kơđi čar, Khua jơnum min djŏp djuai ania mơnuih mơnam Việt Nam yă Bùi Thị Minh Hoài mơit hră bơni hơ-ơč kơ ƀing khua, ƀing ama, ƀing amai hăng abih bang mơnuih ƀôn sang đăo Khŏp, đăo Tin Lành amăng dêh čar ta.

Amăng hră mơit, yă Bùi Thị Minh Hoài bơni hơ-ơč thun Noel mơ-ak mơ-ai, rơnuk rơnua, hơmâo tơlơi khăp ƀu-eng, hrŏm hăng anun tơña bla, bơni hơ-ơč kơ ƀing khua mua, mơnuih djru bruă, mơnuih kŏm drơi kơ tơlơi đăo hăng abih bang mơnuih tui đăo Kitô Việt Nam. Jơnum min djŏp djuai ania mơnuih mơnam Việt Nam tŭ yap, bơni biă mă kơ pran jua “Pơpŭ kơ Ơi adai - Khăp kơ lŏn ia”, “Hơdip hiam tui tơlơi pơtô mơ̆ng ơi adai mut hrŏm hăng mơnuih tơpuôl” mơ̆ng neh met wa tui đăo Khŏp hăng đăo Tin lành hrơi blan rơgao. Lu khua đăo, ƀing ama, ƀing amai kiăo tui tơlơi pơtrun mơ̆ng Ping gah, tơlơi phiăn mơ̆ng Kơnuk kơna; gir iâu pơthưr neh met wa đăo bơkơtưn khăp kơ lŏn ia, ngă tui djŏp bruă yua Jơnum min djŏp djuai ania hăng hơdôm khul grup kơđi čar - mơnuih mơnam pơphun./.