Pơtum glăi mông jơnum, Khua git gai Ping gah ơi Tô Lâm pơsit, bruă ngă tui Tơlơi pơtrun 66 hrơi blan rơgao hơmâo pơplih rơđah laih, hăng lu tơlơi pơplih prong amăng bruă akŏ pơdong, čih pơkra tơlơi phiăn, tơlơi pơkă, djơ̆ hăng rơnuk đĭ kyar lŏn ia.

Khua git gai Ping gah kiăng, Ping gah amăng Ƀirô khua pơ ala mơnuih ƀôn sang, Ping gah amăng Kơnuk kơna, hơdôm ding jum, anom bruă Gơnong dlông hăng tơring čar ngă tui klă djŏp tơlơi hơmâo ba tơbiă, tơlơi kiăng ngă amăng tơlơi pơtrun.

Lăi rơđah, thun 2026 jing thun yom biă mă- jing thun blung a ngă tui Tơlơi pơtrun Jơnum ping gah dêh čar tal 14 hăng pran jua ba tơlơi pơtrun anai dưi mut amăng tơlơi hơdip mơda hlao, ƀu dưi ngă kaih, Khua git gai Ping gah kiăng pơƀut ngă 3 mơta bruă prong, anun lĕ sem lăng pơsit jing tơlơi phiăn gêh găl hơdôm tơlơi pơmin, tơlơi pơtrun prong mơ̆ng hră pơ-ar yom Jơnum ping gah dêh čar tal 14; ječ ameč čih pơkra giong hră pơ-ar či ngă tui 51 tơlơi phiăn hăng 8 tơlơi pơtrun phrâo hơmâo Jơnum lok 10, Khua mua pơ ala mơnuih ƀôn sang dêh čar tal 15 kĭ brơi, ƀu brơi ngă kaih ôh hơdôm hră pơtô ba hăng hơdôm tơlơi gêh găl či ngă tui tơlơi phiăn hăng pơƀut pơklaih brơi tañ hloh hơdôm tơlơi tơnap, tơlơi gun kơ tơlơi phiăn, ƀu dưi pơgăn anŏ đĭ kyar ôh; pơsir hlao 317 tơlơi lăi glăi, rơkâo đĭ hơmâo anŏ tơnap, anŏ gun găn amăng thun 2026 tui jơlan hơdră, hrơi mông hơmâo pơkă; prăp rơmet pơsir mă hơdôm tơlơi rơkâo đĭ, tơlơi lăi glăi phrâo hơmâo amăng mông ngă bruă.